Dy afatet që i janë vënë Kurtit: Erdhi dita për qeverinë apo për dështim?

Që nga përfundimi i zgjedhjeve të 6 tetorit, Vetëvendosja dhe Lidhja Demokratike e Kosovës përveç që janë pajtuar për t’u takuar përsëri, nuk kanë marrë tjetër vendim, e aq më tepër kanë qenë tepër larg marrëveshjes për të krijuar qeverinë e re, gjë për të cilën qytetarët ua besuan votën e tyre, shkruan Gazeta Metro.

Mirëpo, pas më shumë se 100 ditësh, s’ka as marrëveshje e as qeveri dhe tashmë Albin Kurti ka mbërritur në fund të rrugës, dhe i janë vendosur dy afate për të krijuar qeverinë; njëra nga Presidenti Hashim Thaçi, i cili i ka vënë afat prej 15 ditësh të hedh në votim kandidimin e tij, dhe në anën tjetër Isa Mustafa i ka dhënë afat deri në fund të javës për të pranuar ofertën e tij, ose të shpallin dështimin e marrëveshjes.

Afati i parë i vendosur nga Thaçi për 15 ditë

Presidenti i Kosovës i ka vënë në dispozicion vetëm 15 ditë kohë Albin Kurtit që t’ia ofrojë Kuvendit përbërjen e kabinetit qeverisës. Në rast se kjo dështon herën e parë, atëherë Presidenti bazuar në Kushtetutë ka të drejtë që të mandatojë një kandidat tjetër për mandatar për themelimin e qeverisë.

Pra, Kurti duhet deri në atë afat ( nga data 20 janar) të arrijë marrëveshje me LDK’në ose nëse nuk arrijnë pajtueshmëri me ta të gjejë një tjetër alternativë për të bërë qeverinë.

Kujtojmë, që zyrtari i VV’së Xhelal Sveçla ka treguar planin B, nëse nuk arrihet marrëveshje me Isa Mustafën, duke parë si opsion formimin e një qeveria me pakicat, shkruan Gazeta Metro.

“Ne po insistojmë në një marrëveshje të drejtë me LDK’në si partner në qeverisje dhe do të tentojmë që deri në fund ta arrijmë. Por, edhe qeveria e pakicave është një opsion, por ne jemi të vendosur që të punojmë drejt një marrëveshje me LDK’në”, kishte thënë Sveçla.

Afati i dytë i vendosur nga Mustafa, deri në fund të javës

Isa Mustafa ka thënë se partia e tij mbetet tek oferta e fundit që i ka dërguar Lëvizjes Vetëvendosje për qeverisje të balancuar dhe me përgjegjësi të barabarta. Mustafa i ka dërguar mesazh Vetëvendosjes se deri në fund të kësaj jave të tregojnë se a janë për një koalicion me LDK’në, apo të tregojnë se nuk arrihet kjo marrëveshje mes dy partive.

“…ne kemi dhënë një propozim që kemi vlerësuar se është propozim shumë i balancuar dhe kemi menduar që Vetëvendosja duhet ta trajton me vëmendje të veçantë dhe mbesim të hapur që të ulemi të bisedojmë, por ajo bisedë e jonja të ketë përfundim sa më të shpejtë, mundësisht deri në fund të kësaj jave në mënyrë që ta bëjmë marrëveshjen ose të konstatojmë se nuk ka kushte që marrëveshja të bëhet”, ka thënë Mustafa.

Për fatin e keq të Kosovës edhe viti 2019, fiks 104 ditë pas mbajtjeve të jashtëzakonshme të zgjedhjeve, ka bllokuar vendin, dhe po e dëmton ecurinë e proceseve politike, dhe e gjithë kjo falë disponimit të Kurtit e Mustafës për t’i zvarritur ndarjet e posteve dhe të mbajnë peng vendin.

Kujtojmë, që ditëve të fundit në ‘lojë’ janë futur edhe letrat me oferta që partitë VV dhe LDK po i dërgojnë njëra tjetrës e nuk po i pranojnë kushtet asnjëra.

Kurti i ka ofruar Mustafës postin e Presidentit në mënyrë që partia e këtij të fundit të heqë dorë nga kryeparlamentari, që tashmë i takon Vetëvendosjes, mirëpo Albin Kurti ka kërkuar që Ministria e Punëve të Brendshme dhe ajo e Punëve të Jashtme t’i takojnë subjektit të tij, gjë e cila po shihet si e pamundshme nga ana e Lidhjes Demokratike të Kosovës.

Vetëvendosje përmes një zarfi ka refuzuar propozimin e LDK’së që t’ia kthejnë kryeparlamentarin deri në zgjedhjen e presidentit nga LDK’ja dhe ndarjen e ministrive 5 me 5.

Kujtojmë se oferta e fundit e LDK’së ndaj VV’së ishte që t’i takon pozita e Kryeparlamentarit deri më 2021, pozita e Presidentit dhe 5 ministri./gazetametro.net