Driton Selmanajt kundër Vjosa Osmanit, i thotë të largohet nga partia

Deputeti i Lidhjes Demokratike të Kosovës, Driton Selmanaj, ka kërkuar që nënkryetarja e partisë, Vjosa Osmani të jap dorëheqje nga partia.

Selmanaj ka kritikuar ashpër Osmanin pasi ajo po del kundër qëndrimeve të LDK-së dhe po ndërton karrierën politike duke kundërshtuar këtë parti që i përket edhe ajo.

Sipas tij, Osmani është një shembull i gabuar politikbërës dhe ka kërkuar dorëheqjen e saj nga LDK-ja.

Në një intervistë për Saktë, me gazetarin Xhevdet Pozhari, që u transmetua në ora 18:00, Selmanaj ka thënë se “koalicioni LV – LDK, i ngjan një “fryti” që dy palët po e vrasin pak para lindjes.

Më poshtë gjeni deklaratat dhe videon e plotë të intervistës.

“Ka qenë vendimi i saj, ky ka qenë vlerësim i z.Osmani, por unë nuk dua dhe nuk e mendoj që karrierën tënde politike duhet ta bësh duke kundërshtuar partinë, por nëse eventualisht ka çështje aq të mëdha që nuk pajtohesh me to, atëherë është mirë të diferencohesh në totalin e saj, por jo të jesh brenda saj dhe më pas, po flasim për vendime ndryshe, jo për mendime”,tha Selmanaj.

“Unë nuk do ta shihja angazhimin politik të askujt dhe mënyrën e kundërshtimeve hapur ndaj vendimeve të partisë kur je anëtar i saj. Nuk mendoj unë se kjo është kultura politike që njerëzit duhet të sillen. Mund shpeshherë të përkthehen këto gjëra në vota, sepse në Kosovë ndodhë gjithçka, qoftë edhe për një arsye të pa rëndësishme edhe votohet, por nuk duhet përkthehet kështu, por duhet parë më tepër idenë kolektive, angazhimi kolektiv dhe partinë. Nëse nuk i respekton vendimet e partisë, nuk e gjen vetën ti, të shkosh në parti politike dhe në vazhdimësi të mos i respektosh vendimet e partisë, për mendimin tim dhe kulturën politike, kjo nuk i bënë nder askujt”, tha Selmanaj.

“Nuk mendoj se mund te krijosh karrierë politike duke e kundërshtuar partinë. Nëse ke çështje që nuk pajtohesh me partinë, atëherë duhet distancuar nga ajo, por jo të qëndrosh brenda e të kesh qëndrime të kundërta me vendimet që i marrin brenda partisë. Për një çështje të caktuar brenda partisë diskutohet me orë të tëra, por kur votohet një qëndrim, atëherë ti si deputet ose si anëtar i Këshillit të Përgjithshëm, apo edhe si anëtar i asaj partie, duhet të rreshtohesh në respektimin e atij vendimi. Nëse nuk e respekton atë vendim, atëherë fillon të paraqet problem për ty se je pjesë e asaj partie politike. Për një rast mund edhe të kesh qëndrim ndryshe dhe të qëndrosh në distancë, por nëse në vazhdimësi ndodhë kjo, atëherë është problem serioz dhe duhet të zgjidhesh një parti që është ndryshe, apo edhe një angazhim tëndin politik tjetër”, ka thënë Selmanaj për Kosova Post.