Djali i Dëshmorit siguron ulëse në Kuvendin Komunal të Podujevës

Lulzim Isuf Pollomi, djali i dëshmorit të kombit, ka fituar një ulëse në Kuvendin Komunal të Podujevës nga radhët e Partisë Demokratike të Kosovës (PDK).

Sipas rezultateve përfundimtare të Komisionit Qendror të Zgjedhjeve (KQZ), duke përfshirë edhe votat e ardhura nga diaspora, Pollomi ka dalë kandidati më i votuar i PDK-së me 424 vota, duke siguruar kështu përfaqësim në asamblenë komunale të qytetit.

Në një reagim në rrjetet sociale, ai ka falënderuar qytetarët e Podujevës për mbështetjen e dhënë, me theks të veçantë familjet e dëshmorëve, invalidëve dhe veteranëve të Ushtrisë Çlirimtare të Kosovës (UÇK).

“Falënderimi i takon Zotit, familjes, shoqërisë dhe të gjithë atyre që më kanë mbështetur gjatë këtij rrugëtimi. Do të angazhohem të jem zëri juaj në Kuvendin Komunal. Respekti që keni treguar për mua dhe familjen time gjatë kësaj periudhe ka qenë i jashtëzakonshëm. Falë jush, kemi dalë faqebardhë në këtë sfidë,” – ka shkruar Pollomi.

Lulzim Isuf Pollomi vjen nga një familje me histori të lavdishme atdhetare dhe për herë të parë do të përfaqësojë PDK-në në Kuvendin e Komunës së Podujevës.

Babai i tij, dëshmori Isuf Pollomi, ishte pjesëtar i Ushtrisë Çlirimtare të Kosovës në Zonën Operative të Llapit. Më 15 prill 1999, në një betejë të ashpër kundër forcave serbe, ai ra heroikisht në vijën e parë të frontit duke mbrojtur pozicionet e UÇK-së dhe popullatën civile. Në këtë betejë, forcat çetnike pësuan humbje të ndjeshme.

Varrimi i dëshmorit Isuf Pollomi është bërë në fshatin Herticë, në varrezat e lagjes së Pollomëve. Ai la pas bashkëshorten dhe fëmijët Lirimin, Lulzimin dhe Zyrafeten, si dhe prindërit Sherifen e Hajrën, katër vëllezër dhe tri motra.