Digjet shkolla në fshatin Llugë të Podujevës, del në vendngjarje edhe kryetari Bulliqi |PAMJE

Një shkollë në Podujevë është përfshirë nga zjarri mëngjesin e sotëm, bëhet fjalë për shkollën “Ilir Konushefci”.

Zëdhënësja e Policisë për rajonin e Prishtinës, Flora Ahmeti, njoftoi se nuk ka persona të lënduar.

“Sot rreth orës 07:30 kemi pranuar informatën për një incident zjarri në një objekt (shkollë) në fshatin Lluga të Podujevës. Nuk raportohet për persona të lënduar. Zjarrfikësit dhe policia menjëherë kanë dalë në vendin e ngjarjes.  Zjarri është lokalizuar. Për detaje rreth rastit do të njoftojeni pasi që nga njësitet kompetente të përfundojnë ekzaminimet e vendit të ngjarjes”, njoftoi Ahmeti.

Ndërsa për ta par nga afër ka shkuar edhe kryetari i Komunës së Podujevës, Shpejtim Bulliqi.

Në një njoftim për media thuhet se:

Kryetari i Komunës së Podujevës, Shpejtim Bulliqi, ka vizituar sot shkollën e fshatit Llugë, për t’u njoftuar nga afër me gjendjen e objektit dhe dëmet e shkaktuara si pasojë e zjarrit.

Kryetari Bulliqi tha së bazuar në informacioneve të para zjarri në fillim ka përfshirë kulmin e objektit dhe falë intervenimit të zjarrfikësve dhe policisë zjarri është lokalizuar.

“Fatmirësisht zjarri nuk ka shkaktuar dëme në njerëz.  Janë dëmtuar dy dhoma mësimi dhe tri banjo” tha kryetari Bulliqi.

Lidhur me shkaktarin e zjarrit do të deklarohen organet kompetente, të cilat kanë dalë në vendin e ngjarjes.

Komuna do të intervenojë në kohën sa më shpejtë për sanimin e dëmeve të shkaktuara, ndërsa deri në krijimin e kushteve për mësim në objekt shkollor, për nxënësit e shkollës “Ilir Konushefci” mësimi do të zhvillohet online.