Dezinfektohen shtëpitë e të afërmeve të 55-vjeçares nga Podujeva që u infektua me koronavirus

Dje është konfirmuar rasti i tretë me koronavirus në Podujevë. E infektuara është nga fshati Bradash i kësaj komune. Deri tani, nuk ka asnjë rast të dyshuar për koronavirus atje, derisa shtëpitë e të afërmve të të infektuarës janë dezinfektuar dje, raporton Express.

Për gjendjen në këtë komunë, ka folur specialistja Bedrie Rama, e cila është pjesë e Shtabit të Emergjencës.

Në një prononcim për Gazetën Express, Rama ka thënë se dje e kanë vizituar familjen e të infektuarës dhe të afërme, si dhe kanë bërë dezinfektimin e shtëpive të tyre. Të gjitha këto famile janë në vetizolim.

Sipas Ramës, gjendja e tyre aktualisht është e mirë dhe se deri tani nuk kanë asnjë simptomë, prandaj nuk janë testuar. Thotë se janë në kontakt me Institutin Kombëtar të Shëndetit Publik dhe se nëse shfaqin ndonjë simptomë, do të testohen.

Raste të reja të dyshuara për koronavirus nuk ka pasur as në tri fshatrat e izoluara tashmë.

“Dje, e kemi vizituar familjen e të infektuarit nga Bradashi. Gjendja e familjarëve është e mirë. I kemi dezinfektu 4-5 shtëpi aty, edhe të të afërme meqenëse i infektuara ka pas kontakt me të afërmit, por që gjendja e tyre është e mirë. Asnjë prej të afërme e familjarëve nuk ka pasur ndonjë simptomë të koronavirusit. Nuk janë testuar ende, por jemi në kontakt me Institutin Kombëtar të Shëndetit Publik, që nëse shfaqin ndonjë simptomë të lehtë të iu bëhen testimet. Të gjithë janë në vetizolim. E kanë numrin tonë, edhe për çdo rast mund të na njoftojnë. As në tri fshatrat e tjera, që janë të izoluara nuk ka pasur ndonjë rast të dyshuar”, ka thënë Rama për Express

Ndryshe, dje Instituti Kombëtar i Shëndetit Publik ka njoftuar dje se është konfirmuar edhe një rast i ri me koronavirus, duke bërë që numri i rasteve të shkojë në 20’të.

Sipas, IKSHP’së, e infektuara është një 55-vjeçare nga fshati Bradash.

“Sot me 18.03.2020 është konfirmuar një rast pozitiv për virusin SARS-CoV-2: Rasti i konfirmuar është rast kontakti nga fshati Bradash-Podujevë, e gjinisë femër 55 vjeç”, ka njoftuar IKSHP’ja./Gazeta Express