Deputeti Selmanaj në darkë me snajperistin Prekë Kodra- që dyshohej për planifikimin e atentatit ndaj Kurtit |FOTO

Snajperisti Prekë Kodra, që dyshohej për planifikimin e atentatit ndaj kryeministrit Albin Kurti, rezulton të ketë njohje me deputet të Kuvendit të Kosovës.

Në një fotografi të siguruar nga Shqip.com, Kodra shihet në darkë me deputetin nga radhët e Lidhjes Demokratike të Kosovës, Driton Selmanaj.

Sipas informacioneve fotografia del të jetë realizuar në Prizren në fund të vitit 2020, në kohën kur Selmanaj ishte zëvendëskryeministër.

Të pranishëm në po të njëjtën darkë ishin dhe dy persona të tjerë, njëri nga të cilët kishte shkrepur dhe fotografinë, por Shqip.com nuk ka arritur të bëjë identifikimin e tyre.

Në një përgjigje përmes telefonit, Selmanaj ka konfirmuar takimin me Kodrën, duke sqaruar se kjo është bërë përmes mikut të tij (vëllai i gruas së djalit të axhës).

“Po kjo fotografi po është e saktë, unë jam aty. Ky në mes po është miku jem i shtëpisë, është vëllai i gruas së djalit të axhës temë. Edhe ky ka pas mysafirë prej Shkodrës, ky është nga Zvicra ky miku im, ka pas mysafirë prej Shkodrës dhe më ka thirr mua. Unë kam shkuar para dy vjetësh me sa mbaj mend është kjo fotografi, në rreth të Prizrenit. As emrin nuk ia kam ditë as atëherë as sot”, ka thënë Selmanaj.