Deputeti i Vetëvendosjes i del në mbrojtje mjekut të arrestuar në Podujevë

Deputeti i Lëvizjes Vetëvendosje, Vendenis Lahu, i ka dalë në mbrojtje mjekut në Podujevë i cili u arrestua pasi nuk i dha shërbimin një qytetari e madje e largoi atë duke i bërtitur, sepse e kishte përfunduar orarin e punës.

Lahu e ka quajtur të ngutshëm, të padrejtë, të paligjshëm dhe të papranueshëm, arrestimin e doktorit në Podujevë, i cili shihet në një video duke mos i ofruar ndihmë shëndetësore një qytetari.

Po ashtu ai ka thënë se asnjë qytetar nuk mund të arrestohet mbi paragjykime dhe pa bazë ligjore.

“Është i ngutshëm, i padrejtë, i paligjshëm dhe i papranueshëm arrestimi i doktorit pa sqarimin e rrethanave të plota në të cilat ndodhi gjithë ajo situatë e pakëndshme të cilën e pamë, dhe pa konstatimin objektiv të konsumimit të veprës penale të mosofrimit të ndihmës mjekësore, për të cilën edhe është arrestuar.

Nuk mund dhe nuk duhet të arrestohet asnjë qytetar, mbi paragjykime dhe pa bazë ligjore, e aq më pak një doktor në vendin e tij të punës”, ka shkruar Lahu./Gazeta inFokus/

Reagimi i plotë:

KUR PADREJTËSITË BËHEN NË EMËR TË DREJTËSISË!

I tillë është rasti me arrestimin e mjekut pulmolog në QMF-në e Podujevës. Është i ngutshëm, i padrejtë, i paligjshëm dhe i papranueshëm arrestimi i doktorit pa sqarimin e rrethanave të plota në të cilat ndodhi gjithë ajo situatë e pakëndshme të cilën e pamë, dhe pa konstatimin objektiv të konsumimit të veprës penale të mosfrimit të ndihmës mjekësore, për të cilën edhe është arrsetuar.

Nuk mund dhe nuk duhet të arrestohet asnjë qytetar, mbi paragjykime dhe pa bazë ligjore, e aq më pak një doktor në vendin e tij të punës.

Oraret dhe vendet ku ofrohen sherbimet e caktuara, në kohë te caktuara, përcaktohen nga Organet e QKMF-se.

Për shkelje të etikës dhe deontologjisë mjekësore është Oda e Mjekëve organi kompetent.