Deputetët minoritarë: Nuk e votojmë Qeverinë Kurti, pa na u plotësuar kërkesat

Disa nga deputetët e pakicave jo serbe ende nuk janë përfundimisht të vendosur nëse do ta votojnë qeverinë Kurti. Deputetët e Grupit 6+ kanë qenë të pakoordinuar kur janë pyetur nga Gazeta Express nëse do të votojnë pro qeverisë Kurti të hënën.

Rasim Demiri nga koalicioni Vakat pjesë e 6 + ka thënë se do ta votojnë qeverinë e udhëhequr nga Albin Kurti, por skeptik ka qenë deputeti Fikrim Damka që poashtu bënë pjesë në grupin 6+. Deputeti i Partisë Liberale Egjiptiane, Veton Berisha ka thënë se do ta votojnë qeverinë Kurti nëse kanë një ofertë proporcionale me atë të ministrit.

E hëna e tre shkurtit pritet të jetë sfida më e madhe në veprimtarinë politike shumëvjeçare të Albin Kurtit.

Të hënën në seancën e Kuvendit i mandatuar për Kryeministër nga partia fituese, Albin Kurti pritet që ta propozojë kabinetin e tij qeveritar para deputetëve për votim.

Disa deputetë të pakicave jo serbe thonë se kanë paraqitur kërkesat e tyre për Albin Kurtin dhe deri të hënën do të vendosin nëse do ta votojnë përfundimisht qeverinë që do të udhëhiqet nga Kryetari i Lëvizjes Vetëvendosje.