Deputetët llapjanë në “gjumë”, kolona të pafundme në Vranidoll: Rruga Podujevë–Prishtinë po kthehet në makth

Rruga magjistrale Podujevë–Prishtinë, konkretisht segmenti tek ura në Vranidoll, po vazhdon të mbetet një nga pikat më problematike për qarkullim në Kosovë, duke u kthyer në një “makth të përditshëm” për qytetarët e Llapit dhe për të gjithë ata që e përdorin këtë aks rrugor.

Pavarësisht deklaratave të institucioneve se problemi është sanua disa ditë më parë, situata në terren flet ndryshe. Pas reshjeve të fundit të shiut, problemi është rikthyer në të njëjtën gjendje, me kolona të gjata dhe pritje që në shumë raste zgjasin më shumë se një orë.

Kjo rrugë është arteria kryesore lidhëse mes Podujevës dhe Prishtinës dhe çdo vonesë po ndikon drejtpërdrejt në jetën e përditshme të qytetarëve, në vonesa në punë, shkollë, shërbime shëndetësore dhe transport të mallrave.

Sipas banorëve të zonës, punime janë bërë vetëm “kinse”, madje edhe gjatë natës para zgjedhjeve të 28 dhjetorit, ndërsa tani në terren nuk shihet asnjë makineri apo ekip punues.

Edhe pse këtë javë Kryeministri në detyrë, Albin Kurti, ka qenë tri herë në Podujevë, qytetarët pyesin publikisht nëse ai ka kaluar ndonjëherë nga Vranidolli për ta parë realitetin e kolonave të gjata dhe frustrimin e krijuar.

Ajo që po e bën situatën edhe më shqetësuese është heshtja totale e deputetëve llapjanë, sidomos e atyre të Lëvizjes Vetëvendosje, por edhe mungesa e reagimit nga opozita.

Sipas qytetarëve, deputetët llapjanë janë në një lloj “gjumë politik”, pa asnjë deklaratë publike, pa presion institucional dhe pa asnjë iniciativë konkrete për një problem që prek drejtpërdrejt interesin e mijëra banorëve të kësaj ane.

Qytetarët kërkojnë ndërhyrje urgjente dhe zgjidhje reale, jo deklarata për media apo premtime para zgjedhjeve, pasi kjo situatë po rrezikon seriozisht sigurinë në trafik dhe po dëmton rëndë jetën e përditshme.

“Nuk duam më fjalë, duam vepra. Kjo rrugë është jetike për ne dhe po na trajtojnë sikur nuk ekzistojmë”, shprehen qytetarët.