“Deputetët e PDK-së do të votojnë pro-mocionit”

Java e ardhshme pritet që të jetë vendimtare për mandatin e Qeverisë së Kosovës, sepse sipas paralajmërimeve të hënën është caktuar seanca për votimin e Demarkacionit me Malin e Zi. Ndërsa të mërkurën ajo e mocionit e iniciuar nga partia NISMA, e cila pretendon se i ka nënshkrimet e mjaftueshme të deputetëve të kuvendit, për rrëzimin e Qeverisë.

Lidhur me këtë, analisti i çështjeve politike Nexhmedin Spahiu ka treguar se marrëveshja e demarkacionit  nuk  do të kalojë, dhe sipas tij nuk është aspak mirë që kjo të kalojë.

Ndërsa sa i përket mocionit të iniciuar nga opozita, Spahiu thotë se një pjesë e deputetëve të PDK-së e kanë nënshkruar, andaj kjo na bënë të mendojmë se  mocionin  do ta votojnë edhe deputet tjerë të kësaj partie.

“Për mocionin e rrëzimit të qeverisë nuk e di por besoj që megjithatë ka një numër të madh i deputetëve të cilët janë nga Partia Demokratike e Kosovës që e kanë nënshkruar mocionin. Atëherë kjo na bënë të  mendojmë që edhe deputetët tjerë  të kësaj partie do ta votojnë këtë mocion dhe Qeveria do të bije”, ka thënë Spahiu për Indeksonline.

Ai ka përmendur edhe disa nga të arriturat që kjo qeveri i ka bërë, ku sipas tij Ministria e Punës, sidomos Ministria e Financave e cila është treguar më e suksesshmja prej të gjitha ministrive.

“Por kjo nuk është e mjaftueshme që një Qeveri të qëndrojë edhe më tutje, pasi që ajo ka dështuar në gjërat kruciale për Kosovën”, ka përfunduar ai./Indeksonline