Dënohet me kusht e akuzuara për vjedhje në një argjendari në Podujevë

Gjykata Themelore në Prishtinë, dega Podujevë, e ka dënuar me 1 muaj burg me kusht dhe 200 euro gjobë me kusht, të akuzuarën për vjedhje, F. Xh.

Dënimet e shqiptuara nuk do të ekzekutohen, nëse brenda një viti e akuzuara nuk kryen vepër të re penale, raporton “Betimi për Drejtësi”.

Për shkak të gjendjes së vështirë ekonomike, e akuzuara është liruar nga pagesa e shpenzimeve të procedurës penale.

Aktgjykimi është shpallur të mërkurën, nga gjykatësi Gazmend Bahtiri, pasi e akuzuara paraprakisht pranoi fajësinë për veprën që i vihet në barrë.

“E pranoj fajësinë për veprën penale për të cilën akuzohem, pendohem, më vjen keq për atë që ka ndodhur. Zingjirin ia kam kthyer pronarit, arsyeja pse kam vepruar në këtë mënyrë është se më janë dashur të hollat për shërim të fëmijës tim i cili ka probleme shëndetësore, ka lindur me një veshkë. Është hera e parë që ka ndodhur, i premtoj gjykatës se më nuk do të përsëritet”, ka deklaruar ajo.

Pranimin e saj të fajësisë nuk e ka kundërshtuar prokurorja Ajshe Ferati dhe si i tille është aprovuar nga gjykatësi Bahtiri.

Ndryshe, sipas aktakuzës së 9 gushtit 2018, F. Xh. akuzohet se me 11 tetor 2017, rreth orës 16:30, në argjendarinë “Gold” e cila gjendet në rrugën “Zahir Pajaziti” në Podujevë, me qëllim të përvetësimit të kundërligjshëm për vete apo për personin tjetër, kishte hyrë në argjendari kinse për të bërë ndërrimin e një zigjiri të arit me një zingjir tjetër dhe për këtë shitësi në tavolinën e punës i kishte qitur zingjirët për t’i shikuar klientja, por gjatë kohës kur shitësi kishte bërë matjen e arit, e njëjta kishte arritur të marrë zingjirin i cili peshon 30.60gr, në vlerë rreth 1,260 euro.

Me këtë veprim ajo akuzohet se ka kryer veprën penale “vjedhje” nga neni 325, paragrafi 1 të KPRK-së. /BetimipërDrejtësi