Dënohet llapjani me 4 vite e 7 muaj

Gjykata Themelore në Prishtinë, të premten, ka shpallur aktgjykim dënues ndaj Bashkim M., i cili akuzohet se ka kryer veprat penale të “vrasjes në tentativë “, dy vepra penale të “lëndimit të lehtë trupor”, “asgjësim apo dëmtimit të pasurisë” dhe atë të “mbajtjes në pronësi, kontroll ose posedim të paautorizuar të armëve”, njofton Betimipërdrejtësi.com

Sipas aktgjykimit të shpallur nga kryetari i trupit gjykues, gjykatësi Vesel Ismajli, i akuzuari Bashkim M., është dënuar me dënim unik në lartësi prej 4 viteve e 7 muajve burgim.

Të akuzuarit, për veprën penale të vrasjes në tentativë i është shqiptuar dënimi me burgim prej tri viteve, ndërsa vepra penale e lëndimit të lehtë trupor, e cila parashihej në pikën dy të aktakuzës është absorbuar në kuadër të veprës penale të vrasjes në tentativë.

Ndërsa, për veprën tjetër penale të lëndimit të lehtë trupor, e cila parashihej në pikën tre të dispozitivit të aktakuzës, të akuzuarit i është shqiptuar dënimi me burgim prej një viti, kurse për veprën penale të asgjësimit apo dëmtimit të pasurisë, atij iu shqiptua burgimi në kohëzgjatje prej tre muajve.

Në fund, për veprën penale të armëmbajtjes pa leje, u dënua me 6 muaj me burg.

Tutje, gjykatësi Ismajli ka deklaruar se i akuzuari obligohet që në emër të paushallit gjyqësor të paguajë shumën ne lartësi prej 200 eurove.

Po ashtu, Ismajli ka njoftuar se pala e dëmtuar, për realizimin e kërkesës së saj pasurore juridike udhëzohet në kontest civil.

Ai ka njoftuar palët se kanë të drejtë të paraqesin ankesë ndaj këtij aktgjykimi brenda afatit ligjor prej 15 ditëve, nga dita e marrjes së aktgjykimit në formë të shkruar.

Sipas aktakuzës të ngritur nga Prokuroria Themelore e Prishtinës në vitin 2015, më 27 korrik 2015, rreth orës 14:00, në fshatin Shkajkovc të Komunës së Podujevës, i akuzuari ka tentuar të privojë nga jeta të dëmtuarin Eset M.

E kjo, sipas aktit akuzues, ka ndodhur në atë mënyrë që derisa bashkëshortja e tij, Egzona J. kishte qenë për t’i vizituar prindërit e saj, të njëjtën ka shkuar për ta marr i dëmtuari dhe ai pasi ka arritur të shtëpia e prindërve të të dëmtuarës, me rastin e kthimit dhe të vazhdimit të rrugës për në Prishtinë i ka thënë bashkëshortes së tij që ta drejtojë veturën, meqenëse dëshironte që të hante bukë.

Aktakuza thotë se e dëmtuara ka drejtuar veturën dhe me atë arritur në udhëkryqin që e lidh lagjen e saj me rrugën lokale, papritmas nga drejtimi i kundërt ka ardhur i akuzuari me veturën e tij të tipit kamionetë “Pickup” me shpejtësi të madhe duke i rënë borisë.

Tutje, thuhet se ai ka dal nga vetura me armë në dorë dhe nga pjesa e pasme e veturës së tij, ka marr një shufër të metalit me gjatësi rreth një metër e gjysmë dhe gjithnjë duke i sharë të dëmtuarit.

Sipas aktakuzës, ai revolen e ka futur në brez dhe me shufër ka goditur dhe ka thyer parafangon e veturës të të dëmtuarit, e më pas i dëmtuari ka dal nga vetura duke i thënë “ çka ke, çka të bëmë”.

Akti akuzues thotë se më pas i akuzuari e ka sulmuar dhe goditur me shufër në krahun e majtë. Në atë moment, thuhet se ka dal e dëmtuara nga vetura dhe i ka thënë “mos se unë jam çika e Ramushit”. Sipas prokurorisë, i akuzuari nuk është ndalur dhe e ka sulmuar e goditur me shufër  në kokë të dëmtuarën, me ç’rast ka humbur vetëdijen dhe është rrëzuar në tokë, e kur  bashkëshorti i saj është afruar dhe përkulur për t’i ofruar ndihmë, i akuzuari sërish e ka goditur me shufër në krahun e njëjtë me shufër.

Tutje, në aktakuzë thuhet se kur i dëmtuari është ngritur, i pandehuri e ka nxjerrë revolen dhe ia ka drejtuar, e më pas i dëmtuari e kap në kyçin e dorës në të cilën kishte revolen dhe duke ia larguar në anën e majtë të tij, i akuzuari shtinë me revole dhe e njëjta i bllokohet.

Sipas aktakuzës, i akuzuari duke u përpjekur për ta debllokuar revolen shtyhet prapa dhe ik nga vendi i ngjarjes e qëndron në arrati deri më 28 gusht të vitit 2015.

Gjithashtu ai akuzohet edhe për lëndim të lehtë trupor për shkak të dëmeve që aktakuza thotë se u ka shkaktuar të dëmtuarve me dashje për t’ua dëmtar shëndetin dhe shkaktuar lëndim trupor me mjet të rrezikshëm.

Edhe vepra penale “asgjësimi apo dëmtimi i pasurisë” atij i vihet në barrë, për shkak se me shufër të metalit ka goditur dhe thyer parafangon e veturës të të dëmtuarit Eset M., duke i shkaktuar dëm material në vlerë prej 130 euro./BetimipërDrejtësi/