Dënohen me nga 12 vjet burgim të akuzuarit për shpërthimin në Zhur ku mbeti i vdekur një polic

Dy të akuzuarit për rastin që ka rezultuar në vdekjen e një polici dhe plagosjen e dy të tjerëve në incidentin e janarit të vitit 2020, në fshatin Zhur të Prizrenit gjatë një bastisjeje, Iran Badalli dhe Arben Gashi, janë shpallur sot fajtor, raporton Gazeta Sinjali.

Sinjali mëson se Gjykata Themelore në Prizren sot ka shpallur aktgjykimin, me ç’rast Badalli dhe Gashi janë dënuar me nga 12 vjet burgim, si të akuzuar për këtë rast.

E përditësuar: Gjykata del me njoftim për shpalljen e aktgjykimit

Gjykata Themelore në Prizren e ka konfirmuar se Departamenti i Krimeve të Rënda ka shpallur aktgjykim dënues ndaj të akuzuarve për shkak se:

“Në fillim të muajit janar 2020, në Prizren janë furnizuar me mjet eksplodues nga i akuzuari V.Ç. (i dënuar në vitin 2021 shih SHËNIMIN) e pastaj të njëjtin e kanë fshehur në krevatin e fëmijëve ne dhomën e katit të dytë të shtëpisë të të akuzuarit I.B., në fshatin Zhur, Komuna e Prizrenit dhe pas një kontrolli të autorizuar të kësaj shtëpie nga Njësiti për Hetimin e Trafikimit me Narkotikë, më 28 janar 2020, rreth orës 20:00, në kontakt me këtë mjet, i njëjti ka eksploduar, ku ka gjetur vdekjen zyrtari policor S.Th, kurse policët tjerë të Njësitit gjegjës – të dëmtuarit A.M., J.H., dhe A.B:, si dhe fëmija S.B., kanë pësuar lëndime të rënda trupore.

Këso dore në bashkëkryerje kanë kryer veprën penale Shkaktimi i rrezikut të përgjithshëm nga neni 356,paragrafi 5 (me pasoja vdekjen e një personi), dhe paragrafi4 (me pasoja lëndime të rënda të më shumë personave) dhe 1 lidhur me nenin 31 të Kodit Penal të Republikës së Kosovës.

Në vend dhe kohë të njëjtë të përshkruar përafërsisht si në pikën I të dispozitivit të aktakuzës, në kundërshtim me ligjin e zbatueshëm mbi armët, përveç eksplozivit të lartcekur të shpërthyer, kanë pasur të fshehur edhe eksplozivin e mbetur TNT me peshë prej 809.1 gr dhe një detonator mekanik, në të cilin ishte i vendosur një fitil ngadalndezës në gjatësi 63 cm.

Këso dore në bashkëkryerje kanë kryer veprën penale Mbajtja në pronësi, kontroll ose posedim të paautorizuar të armëve nga neni 366, paragrafi 1 lidhur me nenin 31 të Kodit Penal të Kosovës.“, thuhet në njoftim.

“Andaj Gjykata, në kuptim të Kodit Penal dhe Kodit të Procedurës Penale,  të akuzuarit I.B.,  e GJYKON:

DENIM UNIK ME BURGIM në kohëzgjatje prej 12 vitesh (në të cilin dënim do ti llogaritet koha e kaluar në paraburgim nga data 28.01.2020.

Të njëjtit i vazhdohet masa e paraburgimit deri në plotfuqishmërinë e Aktgjykimit.

Të akuzuarin A.G., e GJYKON

DENIM  ME BURGIM në kohëzgjatje prej 12 vitesh.

Të njëjti në ditën e shpalljes së Aktgjykimit, i ndërpritet masa e arrestit shtëpiak, dhe i caktohet masa e paraburgimit deri në plotfuqishmërinë e Aktgjykimit.”

Ndryshe, javën e kaluar ka përfunduar gjykimi për shpërthimin në Zhur, me ç’rast dy të akuzuarit Badalli dhe Gashi kanë dhënë fjalët përfundimtare të tyre.

I akuzuari Badalli u shpreh se nga gjykata kërkon drejtësi, duke thënë se ky rast është montuar për të.

Në këtë rast, Gashi dhe Badalli janë akuzuar se kanë vendosur mjet eksplodues në shtëpinë e të akuzuarit Badalli në fshatin Zhur, me rastin e bastisjes nga Policia. Mjeti kishte shpërthyer ndërsa kishte mbetur i vdekur polici, Sami Thaqi, ndërsa polici Artur Mrasori, Jetmir Hasanaj dhe Arsim Bytyqi, si dhe fëmija S.B., kanë pësuar lëndime të rënda trupore.