Vdes mamia llapjane Sanije Topanica, iu ndihmoi grave në lindje gjatë luftës
Demantohet edhe një herë Daçiq, ministri i Guinea-Bissau sjell letrën e njohjes në Prishtinë
Shteti i Guinea-Bissaus edhe një herë ka konfirmuar njohjen e Kosovës si shtet. Ministri i shtetit të Guinea-Bissau Fabien Sagna gjatë ditës së sotme ia ka dorëzuar presidentit Hashim Thaçi letrën e njohjes së Kosovës nga ky shtet. Ky rikonfirmim ka hedhur poshtë pohimet e ministrit të Jashtëm të Serbisë Ivica Daçiq, i cili gjatë vitit të kaluar kishte deklaruar se Guinea ka tërhequr njohjen për Kosovë.
Presidenti i Republikës së Kosovës, Hashim Thaçi ka pritur sot në takim ministrin e Shtetit dhe shef i Shtatmadhorisë së presidentit të Guinea-Bissau Fabien Sagna dhe këshilltarin e presidentit, Paulino Cabral.
Në këtë takim, ministri i shtetit të Guinea-Bissau Fabien Sagna ia dorëzoi presidentit Thaçi letrën e presidenti të Guinea-Bissau, José Mário Vaz, me të cilën rikonfirmohet njohja e Kosovës nga ky shtet.
Presidenti Thaçi ka falënderuar ata për prezencën e tyre, pikërisht në dhjetëvjetorin e pavarësisë së Kosovës, duke theksuar se kjo është dëshmia më e mirë se marrëdhëniet ndërmjet Kosovës dhe Guinea-Bissau janë më të forta sesa çdo përpjekje për t’i lënduar ato.
“Falënderoj presidentin Vaz, qeverinë tuaj për njohjen e pavarësisë së Kosovës. Kosova do të jetë gjithmonë një shtet mik i juaji dhe synojmë të thellojmë edhe më shumë bashkëpunimin”, ka thënë Presidenti.
Nga ana tjetër, ministri i Shtetit dhe shef i Shtatmadhorisë të presidentit të Guinea-Bissau, Fabien Sagna në emër të presidentit Vaz, ka uruar presidentin dhe popullin e Kosovës për dhjetëvjetorin e pavarësisë.
