Delegacioni i LDK-së në një takim me ambasadorin Grenell- Flasin për koalicionin
Agim Veliu, Avdullah Hoti dhe Skënder Hyseni janë takuar sot në Berlin me përfaqësuesin special të presidentit Trump për dialogun Kosovë-Serbi, ambasadorin Richard Grenell, shkruan IndeksOnline.
Në këtë takim, Grenelli ka kërkuar që të hiqet taksa dhe të merren vendime të cilat mundësojnë avancimin në dialogun me Serbinë.
Delegaioni i LDK-së e ka njoftuar atë për zhvillimet rreth koalicionit me LVV-në.
Njoftimi i plotë:
I dërguari i posaçëm i presidentit Trump, ambasadori Richard Grenell, u takua sot në Berlin me delegacionin e LDK-së në përbërje të Agim Veliut, nënkryetar i LDK-së dhe Avdullah Hotit e Skender Hysenit, anëtarë të Kryesisë së LDK-së.
Gjatë bisedës, ambasadori Grenell inkurajoi delegacionin e LDK-së që të ruajë përkushtimin për rend dhe ligj dhe të marrë vendime, të cilat e avancojnë dialogun me Serbinë.
Ambasadori Grenell, po ashtu, kërkoi nga delegacioni që të hiqet tarifa ndaj mallrave serbe dhe të përqendrohet në politikat që thellojnë zhvillimin ekonomik dhe krijojnë vende pune për popullin e Kosovës.
Delegacioni i LDK-së e njoftoi ambasadorin Grenell për përpjekjet që po bëhen për të arritur një marrëveshje për formimin e Qeverisë.
