Deklarata e Isa Mustafës, shkaktoi reagime edhe në Turqi

Kryeministri në largim Isa Mustafa dje në seancën e jashtëzakonshme në të cilën u votua mocioni i mosbesimit ndaj kabineti të cilin ai e drejtonte, kritikoi ashpër PDK-në, Kryetarin Veseli dhe Presidentin e vendit Hashim Thaçi.

Mustafa ndër të tjera u shpreh se: “…kjo qeveri timonin e ekonomisë nga Turqia, e ka kthyer drejt perëndimit…”

Kjo deklaratë e tij përveç reagimeve në vend, u kritikua edhe nga disa qeveritarë turq.

Këshilltari i presidencës turke  për ekonomi Yigit Bulut nëpërmjet një postimi në llogarinë e tij personale në rrjetin social facebook, tha se “… fjalitë e kryeministrit të rrezuar përmbajnë karakter gërryes që synon marrëdhëniet ekonomike të shkëlqyera ndërmjet dy shteteve, ai ndoshta ka harruar me miliona euro investime që ka bërë Turqia në Kosovë dhe se vëllimi i tregtisë ndërmjet dy shteteve sot është mbi 300 milionë euro…” transmeton Gazeta e Re.