Dega e PDK-së në Podujevë vazhdon të mbetet pa kryetar

Dega e PDK-së në Podujevë, vazhdon të funksionojë pa kryetar, nga zgjdhjet e jashtëzakonshme të 29 nëntorit 2020 kur Naim Fetahu I cili ishte në garë për kryetar komune pas humbjes kishte dhënë dorëheqje nga kjo pozitë.

Edhe dega e PDK-së në Malishevë, vazhdon të funksionojë pa kryetar, nga data 17 nëntor kur kreu i degës Isni Kilaj vendosi të tërhiqet nga politika, pas humbjes së zgjedhjeve për kryetar komune në balotazh përballë kandidatit të Nismës Socialdemokrate.

Sekretari organizativ i PDK-së në nivel qendror, Betim Gjoshi, ndërkaq ka bërë me dije për KOHËN se për momentin nuk ka ndonjë vendim rreth zgjedhjes së kryetarit të degës së PDK-së, në Malishevë.

“Kryesia e degës është funksionale, ajo i ka nënkryetarët dhe sekretarin organizativ dhe nuk ka ndonjë ngecje në funksionim”, ka theksuar Gjoshi.

Ai ka bërë me dije se kryesia qendrore pritet që së shpejti të marrë një vendim për mënyrën e zgjedhjes së kryetarit të degës në Malishevë, por edhe të disa kryetarëve të degëve të tjera.

“Situatën e ngjashme si në Malishevë e kemi edhe në degët e Gjilanit, Suharekës, Podujevës, dhe besoj që deri në fund të këtij viti do të marrim një vendim për mënyrën e zgjedhjes së kryetarëve dhe njëra nga mundësitë është që të gjitha këto degë të shkojnë në zgjedhje të brendshme të përgjithshme të parakohshme, nga të cilat do të dalin edhe kryetarët e rinj të degëve”, është shprehur Gjoshi.

Zgjedhjet e fundit të brendshme brenda PDK-së janë mbajtur në vitin 2019 dhe në situata normale ato sipas statutit mbahen çdo 4 vjet.