Përveç lidhjeve shoqërore për Denis Novën, Elior Kullën dhe Dritan Papën, gjuetia sportive është një rast i mirë për t’u takuar e kaluar kohë së bashku, megjithëse jetojnë në qytete të ndryshme.

Prej kohësh ata janë pjesë e grupit “Spearfishing Albania Team” dhe fundjava që sapo lamë pas i ka mbledhur në Durrës.

Në një foto që durrsaku Denis Nova ka dërguar pranë redaksisë së DurrësLajm duken tre të rinj me trofetë e tyre, tre peshq goxha të mëdhenj.

Denisi sqaron se kanë kapur 2 peshq të llojit kerr, përkatësisht 5 dhe 7 kg secili, si dhe një levrek rreth 9 kg. Sipas tij, levreku zakonisht arrin 5 kg në detin Adriatik dhe Mesdhe, prandaj për ta është një gjë e rrallë që arritën të kapnin një “gjigand” të kësaj specie.

Dhe për të kujtuar këtë ditë të veçantë për ta, nuk kishte si të mungonte fotoja e rastit. /Express/