Çka po ndodh me drejtorin e Inspeksionit në Podujevë? Katër drejtorë u larguan deri më tani

Me kërkesë të Drejtoreshës së Inspeksionit, Florentina Osmani, për t’u liruar nga detyra si drejtore e këtij dikasteri për shkak të angazhimeve të tjera profesionale, ajo sot është liruar nga kjo detyrë., kështu thuhet në njoftimin e bërë publik nga komuna e Podujevës, transmeton PodujevaPRESS.net

Mirëpo burimet e PodujevaPRESS, brenda komunës kanë treguar se Florentina Osmani është larguar nga pozita gjatë kohës sa ishte Bulliqi në ShBA. Kujtojmë se kjo është drejtoresha e 4-të largohet nga kjo drejtori me shumë probleme.

Para Florentinës në pozitën e drejtorit ishe Besnik Mulliqi.

Në gusht të këtij viti 2022 drejtori i Inspeksionit në Komunën e Podujevës, Besnik Mulliqi, kishte njoftuar se nga kryetari i Komunës ka marrë vendimin për shkarkimin e tij nga kjo detyrë.

Mulliqi, përmes një postimi në Facebook, thotë se vendimi për shkarkimin e tij vjen pas  një aksioni të rrënimeve në fshatin Orllan më saktësisht në zonën e liqenit të Batllavës.

“Shkarkimi ka ndodhur si pasojë e përpjekjeve të mia të vazhdueshme për ta mbrojtur atë zonë dhe jo vetëm!”, ka shkruar Mulliqi.

Ai kishte thënë se ka pasur mospajtime të thella me Kryetarin e komunës së Podujevës, “në njërën anë unë në mbrojtje të ligjit dhe anën tjetër ‘Ai’ në tentim për të më penguar!”. Prandaj edhe më ka shkarkuar.

E pas këtyre deklarimeve të Mulliqit është aktivizuar Prokuroria e Shtetit.

Në veprim për hetime është vënë të premten Prokuroria Themelore e Prishtinës rreth pretendimeve të adresuara nga ish-drejtori i Inspektoratit në Podujevë, Besnik Mulliqi, mbi ndërtimet pa leje në këtë komunë. Nisja e hetimeve është iniciuar pak ditë pasi që Mulliqi ka ngritur akuza në llogari të kryetarit dhe të komunës për pengimin e mbrojtjes së zonës së Orllanit nga ndërtimet e egra.

“Duke iu referuar pyetjeve të parashtruara nga ana juaj, mund t’ju njoftojmë se Prokuroria është duke i shqyrtuar të gjitha pretendimet e dhëna në opinionin publik nga z. Mulliqi, si dhe në bazë të kompetencave të saj do të veprojë konform dispozitave ligjore në fuqi”, thuhet nga Laura Ulaj, zyrtare për media në Prokurorinë Themelore të Prishtinës.

“I gëzohem këtij lajmi dhe mirëpres çdo hetim, me qëllim që të zbardhet e vërteta lidhur me këtë çështje. Shpreh gatishmërinë e plotë, që si institucione lokale, të bashkëpunojmë ngushtë me Prokurorinë për zbardhjen e së vërtetës për ndërtimet ilegale në atë zonë”, kishte deklaruar Shpejtim Bulliqi.

Reagim kishte bërë edhe një person tjetër. Ajet Potera ish drejtor i kësaj drejtorie kishte hedhur një mal me akuza ndaj Bulliqit.

Ish-drejtorit i Inspeksionit në komunën e Podujevës, Ajet Potera ka reaguar pasi kryetari Shpejtim Bulliqi shkarkoi nga detyra drejtorin e Inspeksionit, Besnik Mulliqin.

“Unë, Bedri Maqastena e Besnik Mulliqi e dimë të vërtetën, por ka hasur në vesh të shurdhër të organeve të drejtësisë. Drejtoria e Inspeksionit është drejtoria që i sheh më së mirë vendimmarrjen në nivelin Komunal. Kjo Drejtori e has në terren çdo vendim me shkrim apo pa të, bazuar në ligj apo jashtëligjshëm të drejtorive dhe Kryetarit”, kishte shkruar Potera.

Tutje, Potera ka kërkuar auditim e hetim lidhur me vendimet që janë marrë në këtë drejtorit. Nëse fajtor dalin ish-drejtorët të dënohen por në rast se fajtor del Bulliqi edhe ai duhet të dënohet.

“Unë mendoj se duhet bërë auditimi e hetim i prokurorisë për këto raste! Nëse dalim NE ish Drejtorët fajtorë të dënohemi. Nëse ai atëherë ai duhet të merr dënimin. Nuk bënë më të vazhdon kështu duhet të zbardhur e vërteta në këtë dikastere. Qytetarët e kësaj Komune e meritojnë të vërtetën!”, ka shkruar Potera.

Në qeverisjen e Lëvizjes Vetëvendosje, prej vitit 2020, Drejtoria e Inspektoratit, është udhëhequr nga katër drejtorë.