Çka ndodhi me dekretimin e Ligjit të Pagave? Flasin nga Zyra e Presidentit

Mbrëmë në orën 24:00, ka skaduar afati që është paraparë kur Presidenti i Kosovës, duhej ta dekretonte Ligjin për Paga.

Mirëpo, Presidenti Thaçi nuk e ka bërë një gjë të tillë dhe Periskopi ka marrë një përgjigje nga zyra e Presidentit lidhur me këtë çështje.
Nga Zyra e Presidentit, i kanë thënë Periskopit, se Ligji për Pagat nuk është drekretuar nga Presidenti.

“Projektligji për Pagat nuk është dekretuar nga Presidenti, por pas përfundimit të afatit ligjor ka hyrë në mënyrë të heshtur në fuqi”, thuhet në përgjigjen e Zyrës për Informim të Presidencës, për Periskopin.

Tutje thuhet se Zyra e Presidentit ka marrë premtime nga sponsorët e projektligjit, se do t’i marrin parasysh të gjitha ankesat e paraqitura lidhur me të.

“Zyra e Presidentit ka marrë premtime nga sponsorët e këtij projektligji, se do t’i marrin parasysh të gjitha shqetësimet e paraqitura dhe në të ardhmen e afërt do t’i bëjnë plotësimet dhe ndryshimet e nevojshme”, thuhet në përgjigjen e Zyrës së Informimit të Presidencës”, thuhet në përgjigje.

Ndryshe, në bazë të Kushtetutës së Kosovës, nëse presidenti nuk merr asnjë vendim për 8 ditë, atëherë Ligji llogaritet i shpallur dhe publikohet në Gazetën Zyrtare.

“Nëse Presidenti i Republikës së Kosovës, brenda tetë (8) ditësh pas marrjes së ligjit, nuk merr asnjë vendim për shpalljen ose kthimin e tij, ligji konsiderohet i shpallur, pa nënshkrimin e saj/tij dhe publikohet në Gazetën Zyrtare”, thuhet në Kushtetutën e Kosovës. /Periskopi/