Çka do të ndodhë sot në Kosovë?

Me fillim nga ora 10:00, do të mbahet vazhdimi i seancës plenare të Kuvendit, ku në rend dite janë: Interpelanca e kryeministrit Ramush Haradinaj, lidhur me vendimin e Qeverisë për rritjen e pagave të anëtarëve të kabinetit qeveritar dhe debati parlamentar lidhur me Raportin e 100 ditëve të punës të Qeverisë.

Agjencia Zvicerane për Zhvillim dhe Bashkëpunim do të lansojë Fazën II të projektit “Promovimi i Punësimit në Sektorin Privat”. Në këtë ceremoni do të flasin ministri i Tregtisë dhe Industrisë, Bajram Hasani, dhe ambasadori i Zvicrës, Jean-Hubert Lebet.

Ambasadori i ShBA-së, Greg Delawie, do të urojë praktikantët e sektorit energjetik. Kjo ngjarje do të theksojë përfundimin e praktikës profesionale për 47 praktikantë në sektorin energjetik në rritje e sipër të Kosovës.

Komuna e Prishtinës hap Qendrën e Mjekësisë Familjare nr.3. Marrin pjesë kryetari i Komunës, Shpend Ahmeti, dhe drejtori i Shëndetësisë, Arben Vitia.

Ministria e Punëve të Brendshme (MPB) do të fillojë lëshimin zyrtar të patentë-shoferëve me dizajn të ri. Ministri i Flamur Sefaj do të pajisë disa qytetarë.

Ministria e Tregtisë dhe Industrisë (MTI) organizon konferencë për medie, me rastin e pranimit të aplikacionit të parë për statusin e investitorit strategjik. Pranimin e këtij aplikacioni do ta bëjnë zv.kryeministri Dardan Gashi dhe ministri i Tregtisë dhe Industrisë, Bajram Hasani.

Në orën 20:00, Baleti Kombëtar i Kosovës mban shfaqjen “Ngjyrat e vallëzimit” – “The colors of dance”.

Në të njëjtën orë, në përvjetorin e 15-të, Teatri ODA jep premierën e shfaqjes “Lufta e Tretë Botërore”. /Express/