Cila është gjendja shëndetësore e Albin Kurtit? Flasin nga QKUK’ja

Kryetari i Vetëvendosjes Albin Kurti, është shtruar në QKUK, për shkak se ka grip.

Këtë e kanë bërë të ditur zyrtar të kësaj partie. Ndërkohë, Periskopi ka kontakuar Zyrën për Informim në QKUK, e cila ka dhënë detaje shtesë për gjendjen e Kurtit.

“Zyra për informim në QKUK ju njofton se Kryetari i Lëvizjes Vetëvendosje, Albin Kurti, po trajtohet në Klinikën Infektive të Qendrës Klinike Universitare të Kosovës. Kurti i është nënshtruar të gjitha ekzaminimeve mjekësore dhe gjendja e tij është stabile. Ai fillimisht ishte drejtuar në Klinikën Emergjente dhe për shkak të përcjelljes dhe monitorimit është pranuar tek Klinika Infektive ku po i kryhen të gjitha ekzaminimet e nevojshme mjekësore”, thuhet në përgjigjen e Zyrës për Informim të QKUK’së dhënë Periskopit.

Ndryshe, kryetari i Lëvizjes Vetëvendosje Albin Kurti, është shtrirë në QKUK përkatësisht në klinikën infektive për shkak të një infeksioni gripal, ka njoftuar ish -drejtori i Shëndetësisë në komunën e Prishtinës, Arben Vitia.

Vitia thotë se gjendja e Kurtit tashmë është stabile.

“Të dashur miq, meqenëse shumë prej jush po thërrisni në telefon për të pyetur, po ju njoftoj këtu, Albini sot në mëngjes herët ka patur një shqetësim shëndetësor, për shkak të një infeksioni gripal. Falë përkujdesjes së mjekëve në emergjencë dhe klinikës infektive në QKUK, gjendja e tij tash është më stabile. Pranë tij është kujdesi i mjekëve, familjarëve e aktivistëve. Meqenëse shenjat janë të gjitha të mira, shpresojmë që do të dalë sa më shpejt”, ka shkruar ai në Facebook.