Vdes mamia llapjane Sanije Topanica, iu ndihmoi grave në lindje gjatë luftës
Çfarë do t’i sjellë Kosovës vrulli i Ramush Haradinajt?
Gjysmë ore para mesditës të së hënës, në një ceremoni solemne, Isa Mustafa i dorëzoi pozitën e shefit të ekzekutivit Ramush Haradinajt. E ky i fundit, ditën e parë si Kryeministër, 13 vjet pas 100 ditëshit të tillë në 2004’ën, e mori me shumë vrull e punë.
Ramush Haradinaj ka vendosur të impresionojë ditën e parë të punës, duke realizuar me gjasë një numër rekord takimesh e aktivitesh, që prej se në Kosovë ekziston Zyra e Kryeministrit.
Një dinamikë të tillë Haradinaj e kishte imponuar edhe gjatë vitit 2004, sa kishte qenë në krye të ekzekutivit.
Natyrisht, është ende shumë herët për të bërë analiza rreth punës së Haradinajt, por dinamika nuk duhet të ngatërrohet me rezultatet.
Por, si shkoi dita e parë e Haradinajt në punë?
Pak orë pasi ambasadori amerikan Greg Delawie trokiti i pari në derën e kryeministrit të ri, Ramush Haradinaj ka shkarkuar Komisionin Shtetëror për Demarkacion, të drejtuar nga Murat Meha.
Delawie pas takimit, kërkoi që e gjithë klasa politike në vend të tejkalojë interesat e ngushta politike, dhe të fokusohet tek interesi i shtetit dhe shoqërisë, ndërkohë që vendimi i kryeministrit për Komision emëroi ish-deputetin e LDK’së Shpejtim Bulliqi në krye të atyre që sipas Haradinajt do të korrigjojnë shënimin e vijave kufitare.
E për ketë vendim, në orën 18:00 të të njëjtës ditë, shefi i ekzekutivit morri mbështetjen e pjesës tjetër të kabinetit qeveritar. Në mbledhjen e parë të Qeverisë Haradinaj, 19 nga 21 ministrat e votuan shkarkimin e komisionit. Vetëm dy prej tyre, ministra serbë, abstenuan.
Kur dita e parë e punës së Haradinajt në Kryeministri u mendua të ketë përfunduar, pasi ai në selinë e partisë së tij priti kandidatët e AAK’së për kryetar komunash, ai në orën 20:30 vizitoi QKUK’në.
I shoqëruar nga zëvendëskryeministri i parë, Behgjet Pacolli, dhe ministri i Shëndetësisë, Uran Ismaili, Kryeministri Ramush Haradinaj gjatë vizitës në Repartin e Emergjencës të Qendrës Klinike Universitare të Kosovës, u zotua se do t’u qendrojnë pas në përmirësimin e gjendjes së shëndetësisë kosovare.
Para shkuarjes në QKUK, Haradinaj bashkë me Pacollin u ndalën në sheshin kryesor të Prishtinës, për të ndezur qirinj pranë Teatrit Kombëtar, në përkujtim të sulmit të 11 Shtatorit në SHBA.
Vonë në mbrëmje, Kryeministri i ri i vendit, ka pritur edhe shefin e Misionit të BE-së për vëzhgimin e zgjedhjeve, Alojz Peterle.
Që ka qenë një ditë e lodhshme, dhe krejt ndryshe nga të tjerat, e ka treguar edhe vetë shefi i kabinetit të Haradinajt. Avni Arifaj pak para orës 23:00 në facebook, ka publikuar fotografi të kabinetit të ri kryeministror ku tregon se ende janë duke punuar.
“22:45. Veç edhe pak e ndoshta po kryhet një ditë shumë e gjatë dhe shumë ma ndryshe prej ditëve tjera”, ka shkruar ai.
Po ashtu, Haradinaj ka takuar edhe dy partnerët e koalicionit, Kadri Veselin e Fatmir Limajn, si dhe Shefen e Zyrës së BE’së Natalia Apostolova.
Por, në agjendën e publikuar, ditë e ngjashme me angazhime del të jetë edhe e marta për Haradinajn dhe bashkëpunëtorët e tij. Ai ditën e sotme e ka nisur me vizitë në termocentralin Kosova A, të Korporatës Energjetike të Kosovës, e më pas Komunën e Obiliqit. /GazetaExpress/.
