Në takim, fillimisht Çelaj ka vlerësuar lartë përkushtimin e kandidatit për asamble, Z. Migjen Shala, për të vijuar me prioritet e qeverisjes së tij, si një nga më të rëndësishmet, për sigurinë.

“Siguria do trajtim me prioritet, ngase, çdo ditë jemi dëshmitar për përkeqësimin e situatës jo vetëm për sigurinë fizike dhe të pronës, por edhe të sigurisë në shkolla dhe trafik”, ka theksuar Çelaj, duke shtuar se cilësia e jetës në Prishtinë është e lidhur ngushtë me sigurinë, andaj ky është prioritet i një nga tetë çështjet e programit qeverisës në mandatin e tij të ardhshëm në krye të komunës.

Çelaj ka folur për kaosin urbanistik, ndërtimet mbi gjelbërim si dhe padrejtësinë që janë shfaqur gjatë procesit të dhënies së lejeve të ndërtimit. Ai ka theksuar se Komuna ka punuar me dy kute, gjë të cilën ai nuk do ta lejojë, duke e trajtuar me qasje ndryshe dhe pa përjashtuar askënd nga të mirat që ofron qyteti.

Lehtësimi dhe përkrahja e legalizimit, me programin “Legalizimi 1 euro”, sipas Çelajt, do ta mënjanonte nga rendi i ditës një herë e përgjithmonë, çështjen e legalizimit. Ndërsa Lagja Kodra e Trimave, do të avancohej në zonë e ndërtimit të lartë, për tejkalimin e kaosit ndërtimor në këtë zonë të rëndësishme të qytetit.

“Gollaku do të shpallet Bio-Zonë, ku në mënyrë të planifikuar do të ngritej një bujqësi e bazuar në metodat e prodhimit bio, si dhe zona e Gollakut do të bëhej fokus i turizmit”, theksoi Lirak Çelaj duke vënë në pah të mirat e kësaj zone, favoret që ofron si dhe vendosmërinë e tij që Gollakun të bëhet shembull i prodhimit bujqësor bio në vend. Për këto projekte, Çelaj ka paraparë subvencione që do të arrijnë vlerën e 1.7 milion eurove.

Ai, ka shpjeguar edhe çështjen dhe lehtësimin e qasjes për punësimin e të rinjve, duke shpalosur projektin e Prishtinës Digjitale, ku sipas tij, do të organizohet zona e caktuar në komunë me objekte të veçanta si qendër biznesi ku do të fokusohej potenciali i Teknologjisë Informative dhe ku pritet të punësohet deri 3.000 të rinj, ekspertë të fushës teknologjike.

Çelaj, gjatë këtij prezantimi, iu përgjigj edhe pyetjeve të shumta të pjesëmarrësve në takim, ku në fokus kishin keqqeverisjen aktuale e cila nuk ka ofruar kurrfarë zgjidhjeje për sfidat e tyre./Express/