Burri rrah dhe kërcënon me armë bashkëshorten, ajo kërkon ndihmën e Policisë

Vajzat dhe gratë vazhdojnë të mbeten viktimat më të shpeshta të dhunës në familje. Bashkëshortët dhe anëtarët tjerë të familjes në shumë raste ushtrojnë dhunë sistematike në mënyra të ndryshme ndaj tyre, raporton Gazeta Sinjali.

Në Polici kanë përfunduar dje edhe një çift nga Prishtina, pasi burri dyshohet se ka ushtruar dhunë ndaj bashkëshortes së tij.

Burimet e Gazetës Sinjali brenda Prokurorisë kanë bërë me dije se përpos dhunës fizike që ushtroi ndaj viktimës, 43-vjeçari dyshohet se të njëjtën e ka kërcënuar me armë.

Si rezultat i denoncimit, i dyshuari është intervistuar nga organet e hetuesisë dhe të njëjtit i janë sekuestruar dy armë zjarri dhe municion.

Pas përfundimit të procedurave policore, Prokurori i Shtetit ka nxjerrë aktvendim që të dyshuarit t’i caktohet masa e ndalimit policor nën dyshimet për kryerjen e tri veprave penale ‘Dhunë në familje’, ‘Kanosje’ dhe ‘Mbajtje në pronësi, kontroll ose posedim të paautorizuar të armës’.