Peci dorëzohet para presionit publik: Anulon grantet për këshilltarin e tij dhe
Bulliqi: S’ka nevojë për presion ndaj deputetëve nga Amerika
Lidhja Demokratike e Kosovës ka ftuar për sot deputetët e saj në mbledhjen e Grupit Parlamentar, në të cilën do të marrë pjesë kreu i partisë, Isa Mustafa, i cili njëherësh është edhe kryeministër, si dhe ambasadori amerikan në Kosovë, Greg Delawie.
Kjo po bëhet për t’i shfrytëzuar përpjekjet e fundit për t’i bindur deputetët që janë kundër demarkacionit që ta votojnë atë.
Por deputeti i kësaj partie, Shpejtim Bulliqi, i cili është ndër më të zëshmit në LDK kundër demarkacionit, nuk beson se ka nevojë që të ushtrohet presion ndaj deputetëve për këtë çështje.
Ai ka thënë se miqtë amerikanë do të ishte mirë që të krijonin kushte për rinegocim të pjesëve kontestuese të kufirit me Malin e Zi.
“Mendoj që mirë është që interesohen miqtë tanë për të na ndihmuar të dalim nga kjo situatë. Por mendoj që ndihma më e madhe e tyre do te ishte sikur të na ndihmojnë për t’i krijuar kushtet për rinegocimin e atyre segmenteve që janë kontestuese në vijën kufitare me Malin e Zi”, ka thënë deputeti Bulliqi për Insajderin.
“ShBA-së i jemi mirënjohës për të gjitha që kanë bërë për ne edhe në këtë rast, por ne jemi të obliguar si deputet të punojmë në ruajtjen dhe mbrojtjen e integritetit territorial të vendit”, ka shtuar Bulliqi.
Për më tepër, dje ka dështuar të mbahet mbledhja e Qeverisë së Kosovës, në të cilën, ndër pikat e rendit të ditës ka qenë edhe shqyrtimi i projektligjit për Marrëveshjen e Demarkacionit mes Kosovës dhe Malit të Zi, shkruan Insajderi.
Gjatë kohës kur pritej të mbahej mbledhja, kryeministri Isa Mustafa, kreu i Kuvendit Kadri Veseli dhe ambasadori amerikan në Kosovë, Greg Delawie, kanë mbajtur një takim. Më pas u njoftuar se Qeveria e ka shtyrë mbledhjen për të mërkurën.
