Bora i ndali zjarret e qëllimshme në pyjet e Podujevës

Reshjet e borës gjatë mbrëmjes së të hënës dhe ditës së martë kanë mundësuar ndaljen e zjarreve në pyjet e fushat e Komunës së Podujevës. Vetëm për një javë (nga e hëna e 16 marsit deri më 22 mars) janë 36 raste të intervenimit të zjarrfikësve në fikjen e zjarreve.

Sipas zjarrfikësve, ato janë shkaktuar qëllimshëm nga faktori njeri. Për këtë ka pasur edhe të intervistuar nga Policia e Kosovës.

Shefi i Shërbimit të Zjarrfikësve dhe Shpëtimit në Komunën e Podujevës, Milaim Ajvazi, ka thënë se vetëm në pyje për këtë periudhë i kanë pasur 24 zjarre.

“Gjatë periudhës 16-22.3.2020 Njësia profesionale e Zjarrfikësve dhe Shpëtimit në Podujevë ka intervenuar në 36 raste të zjarreve nëpër lokacione të ndryshme brenda zonës së përgjegjësisë të cilën e mbulojmë. Struktura e zjarreve është si në vijim: 24 raste kemi zjarre malore, 10 raste janë zjarre fushore (bar i thatë, kullota, etj.) dhe 1 rast djegie e një objekti ndihmës (shupë) në Buricë. Intervenimi i natyrës teknike ka qenë në Shakovicë, pastrim i rrugës pas një aksidenti të komunikacionit”, ka deklaruar Milaim Ajvazi. “Sa u përket statistikave të dëmeve të sipërfaqeve të djegura, ne si institucion nuk kemi mekanizëm përcjellës. Shkaktari i zjarreve është faktori njeri. Zjarret janë kryesisht të shkaktuara qëllimisht nga faktori njeri”, raporton KOHA.

Ndërkohë, zëdhënësja e Policisë së Kosovës, Florie Ahmeti, ka thënë se për periudhën njëjavore i kanë të raportuara dy raste për zjarrvënie.

“Për periudhën për të cilën ju keni kërkuar të dhëna, janë të raportuara dy raste. Një person është intervistuar si person i dyshuar për njërin rast, ndërsa për rastin tjetër nuk kemi ndonjë person të dyshuar ende. Rastet janë duke u trajtuar nga njësitë kompetente”, ka thënë Florie Ahmeti. “Policia ka një bashkëpunim të ngushtë me rojat e pyllit, kryetarët e KLSP-ve, kryetarët e fshatrave dhe vazhdimisht jemi duke punuar me qëllim të parandalimit të dukurisë së zjarreve në gjithë zonën e përgjegjësisë”.