Bixhozi s’ka të ndalur në Podujevë: Kapet në flagrancë 23-vjeçari që organizonte bastore ilegale

Edhe pse i ndaluar me ligj, bixhozi i paligjshëm vazhdon të lulëzojë në Podujevë, ku policia ka zbuluar një tjetër lokal që organizonte lojëra të fatit pa licencë, duke arrestuar një person dhe sekuestruar prova materiale.

Sipas burimeve të Sinjalit, më 13 tetor 2025 rreth orës 21:00, njësitë e hetimeve kanë ndërmarrë një aksion operacional pas informacioneve se në rrugën “Ahmet Haxhiu” po zhvillohej veprimtari ilegale e lojërave të fatit në një lokal pa emër.

Gjatë kontrollit, në koordinim me Prokurorin Kujdestar, policia ka konfiskuar para të gatshme – 85 euro dhe 1.000 dinarë, si dhe pajisje elektronike që shërbenin për organizimin e lojërave të fatit dhe bastoreve ilegale.

Në vendngjarje është arrestuar një person i cili pas shoqërimit në Stacionin Policor të Podujevës ka pranuar organizimin e veprimtarisë së paligjshme. Ai është intervistuar në prani të avokatit mbrojtës.

Me vendim të Prokurorit Kujdestar, rasti është inicuar për veprën penale “Organizimi i skemave piramidale dhe bixhozit të paligjshëm”, ndërsa ndaj të dyshuarit është lëshuar aktvendim për ndalim prej 48 orësh.

Hetimet për këtë rast po vazhdojnë, ndërsa policia ka planifikuar aksione të tjera kundër organizatorëve të bixhozit të paligjshëm në komunën e Podujevës.