Biden i shkruan Vuçiçit: Dialogu me Kosovën duhet të përfundojë me njohje reciproke

Presidenti i Shteteve të Bashkuara të Amerikës, Joe Biden, në letrën e dërguar homologut të tij serb, Aleksandër Vuçiç me rastin e urimit të Ditës së shtetësisë së Serbisë, mes tjerash ka potencuar se aspirata e këtij shteti drejt Bashkimit Evropian varet ekskluzivisht nga normalizimi i marrëdhënieve me Kosovën e cila duhet të bazohet në njohjen reciproke.

“Shtetet e Bashkuara janë të gatshme t’ju mbështesin në punën me mirëbesim për të arritur këtë qëllim. Familja evropiane nuk do të jetë e plotë pa Serbinë dhe të gjithë fqinjët e saj”, ka shkruar Biden.

“Unë ju inkurajoj ju dhe qeverinë tuaj që të vazhdoni të punoni me zell në zbatimin e reformave të brendshme që nevojiten për t’i bërë arritjet e demokracisë të disponueshme për të gjithë njerëzit në Serbi”, ka pohuar më tej Biden.

Presidenti amerikan ka theksuar se gjatë 140 viteve të partneritetit, të dy vendet kanë ndërtuar marrëdhënie të forta që mbështesin zhvillimin ekonomik dhe që promovojnë prosperitetin e popullit serb, ofrojnë mbështetje për institucionet demokratike në Serbi dhe rolin jetik të shoqërisë civile dhe mediave. /Albanianpost.com