Bedri Hamza: Reformat në PDK janë të domosdoshme, na duhen njerëz të rinj

Ish-shefi i Grupit Parlamentar të PDK-së, Bedri Hamza thotë se reformat brenda partisë janë të domosdoshme dhe se PDK ka nevojë për njerëz të rinj dhe të përgatitur.

Për rezultatin e zgjedhjeve thotë se brenda Partisë Demokratike ekziston një gatishmëri për ta analizuar këtë rezultat dhe shkaqet që e prodhuan atë.

“Reformat janë të mirëseardhura dhe të domosdoshme. Partia ka nevojë për djem dhe vajza të reja, të përgatitura. Partia ka disponim dhe është e hapur për njerëz të rinj të përgatitur dhe që marrin përgjegjësi”, deklaroi Hamza

Për largimet e mundëshme pas rezultatit zgjedhor, Hamza thotë se largimet nuk janë të mira.

“Largimet nuk janë të mira, pasi që partia ka nevojë për më shumë se që ka. Por realisht ka njerëz që duan të bëjnë edhe diçka tjetër përpos politikës dhe kjo është e kuptueshme. Prurja e njerëzve të rinj është e domosdoshme. Ka disponim në parti për analizimin e rezultatit zgjedhor”, thotë Hamza.

Burime të Gazetës Blic brenda PDK-së thonë se në këtë parti ka pasur takim me kryetarët e degëve të cilat kanë pësuar rënie dhe se do të analizohet ky rezultat.

“Ka pasur takime me kryetarët e degëve që kanë pësuar rënie në këto zgjedhje. Do të analizohet rezultati dhe pastaj do mirret vendimi se si do të vazhdohet, por një here po analizohet rezultati”, ka deklaruar ky burim brenda PDK-së.

Sipas rezultateve preliminare, pa votat e diasporës dhe atyre me kusht, PDK del të jetë partia e dytë në vend me 17.41% të votave.