Bastisje masive nga Prokuroria ndaj ish-drejtuesve të Byrosë Kosovare të Sigurimeve, bastisje edhe në Podujevë

Mazreku e Berisha dyshohet se manipuluan raportet e dëmshpërblimeve nga aksidentet

Valon Berisha i cili në vitin 2023 ushtronte pozitën drejtor i Departamentit të Financave në Byronë Kosovare të Sigurimeve, është arrestuar në aksionin e sotëm që u zhvillua në disa regjione të Kosovës.

Berisha po dyshohet që nga korriku i vitit 2022 deri në 9 tetor 2023 së bashku me Sami Mazrekun në cilësinë e Drejtorit Ekzekutiv të BKS kishin përfituar jashtëligjshëm para nga Byroja e Sigurimeve duke shfrytëzuar detyrat e tyre dhe duke keqpërdorur besimin e qytetarëve. Mazreku dhe Berisha po dyshohen se nga qytetarët kishin përfituar para duke manipuluar me dëmshpërblime për aksidente të trafikut.

Përveç Mazrekut e Berishës  të dyshuar janë edhe 45 qytetarë të tjerë. Të njëjtit sipas Prokurorisë dyshohen se kishin dhënë besimin e tyre për t`u përdorur xhirollogaritë bankare për transfere bankare nga Byroja Kosovare e Sigurimeve.

Berisha e Mazreku si persona përgjegjës pretendohet se me qëllim të përfitimit të kundërligjshëm të parave kanë përpiluar dokumente me përmbajtje të rreme me bilance të rreme dhe në këtë mënyrë kanë vënë në lajthitje organet drejtuese në organizatën e biznesit gjatë vendimmarrjes lidhur me veprimtaritë menaxhuese. Sipas Prokurorisë Mazreku si Drejtor Ekzekutiv e Berisha si Drejtor i Financave në kundërshtim me rregullat dhe procedurat e brendshme pa dokumentacion mbështetës dyshohen se kanë kryer transfere bankare të pajustifikuara e po ashtu pretendohet në bazë të hetimeve se të njëjtit kanë bërë edhe raportime me përmbajtje të bilanceve të rreme, transaksione të pabaza me qëllimtë përfitimit.

08:24- 45 qytetarë e dy zyrtarë të Byrosë së Sigurimeve të dyshuar për përfitime të jashtëligjshme

KALLXO.com zbulon detaje të tjera për operacionin e Prokurorisë së Prizrenit. Aksioni është drejtuar nga tetë prokurorë dhe është udhëhequr nga Kryeprokurori i Prizrenit, Petrit Kryeziu.

Në listën e të dyshuarve janë 45 qytetarë, Drejtori Ekzekutiv i Byrosë Kosovare të Sigurimeve (BKS), si dhe Drejtori i Financave të kësaj byroje. Ata dyshohen se kanë përfituar kundërligjshëm duke keqpërdorur pozitën zyrtare dhe besimin.

Rolin kryesor në dëmin që pretendohet se i është shkaktuar buxhetit të Byrosë, në vlerë mbi 1 milion euro, e kanë pasur dy zyrtarë të lartë të BKS-së: Sami Mazreku dhe Valon Berisha, ky i fundit në cilësinë e drejtorit të financave.

Sipas dyshimeve, Mazreku dhe Berisha kanë marrë llogaritë bankare të 45 qytetarëve, tek të cilët kanë transferuar mjete financiare përmes marrëveshjeve të parapërgatitura, nga të cilat kanë përfituar mijëra euro.

Po ashtu, ata dyshohet se kanë identifikuar qytetarë të përfshirë në raste aksidentesh trafiku, të cilëve u janë transferuar para me arsyetimin e kompensimit të dëmeve. Me këta qytetarë janë bërë marrëveshje që një pjesë e vogël e mjeteve t’u mbetej atyre, ndërsa pjesa më e madhe e shumës së transferuar të përfundonte te Mazreku dhe Berisha.

Pronat e ish-drejtuesve të Byros Kosovare të Sigurimeve (BKS) janë cak i një bastisjeje masive që ka nisur në orët e hershme të mëngjesit. Bastisjet, të udhëhequra nga Prokuroria e Prizrenit, kanë për objekt pronat e ish-drejtorit të BKS-së, Sami Mazreku, si dhe të paktën një ish-zyrtari tjetër të kësaj byroje.

Dyshimet e këtij operacioni lidhen me manipulime të mundshme në kompensimin e dëmeve.

Në operacion janë angazhuar mbi 300 policë nga njësitë për krime ekonomike dhe financiare, ndërsa aksioni po zhvillohet në rajonet e Prizrenit, Prishtinës, Gjilanit, Mitrovicës, Drenasit, Pejës, Obiliqit, Gjakovës, Rahovecit, Podujevës, Dragashit e Ferizaj.

Bastisjet janë ende duke vazhduar, ndërsa Kallxo.com do t’ju mbajë të informuar për rezultatet e këtij operacioni.