Banorët e Gllamnikut të shqetësuar me mospërfundimin e nënkalimit

Banorët e fshatit Gllmanik të Podujevës po e kërkojnë përfundimin e nënkalimit në magjistralen Prishtinë-Podujevë. Ata thonë se në mungesë të tij, nxënësit detyrohen që të bëjnë nga 4 deri në 5 kilometra distancë për të shkuar në shkollën që gjendet vetëm matanë rrugës. E lidhur me shkaqet e mospërfundimit të nënkalimit, zyrtarët e Ministrisë së Infrastrukturës nuk u janë përgjigjur pyetjeve të KOHËS për më se një muaj

I papërfunduar ka mbetur për gati tre vjet nënkalimi në magjistralen Prishtinë-Podujevë, afër shkollës fillore “Kongresi i Manastirit” në fshatin Gllamnik.

Për pasojë, banorët, e veçmas nxënësit, detyrohen të udhëtojnë në një fshat tjetër, rreth 5 kilometra larg, për të kaluar në anën tjetër të rrugës.

Osman Bahtiri, përfaqësues i fshatit Gllamnik, ka thënë se ende nuk e dinë arsyen e mospërfundimit të këtij nënkalimi.

“Ky nënkalim ka filluar moti, nuk u rregullua, nuk e dimë përse. Shumë është i nevojshëm edhe për qytetarët. Të gjithë ne kemi punë me dalë në këtë rrugë, në shitore, në lokal edhe me ardhë në shkollë, me i sjellë nxënësit tonë, fëmijët tonë, nipat tonë e mbesat tona. Neve na duhet të qarkullojmë nga 4-5 kilometra së paku me shku deri te rrethrrotullimi në fshatin Sibofc për me u kthye këtu, ku i kemi shtëpitë. Ne i kemi përballë shtëpitë të gjithë këndej afër, e duhet me i bë 4-5 kilometra”, ka deklaruar Bahtiri.

Agim Syla, nga ky fshat, ka thënë se fëmijët do ta kishin shumë më të lehtë vajtjen në shkollë nëpërmjet nënkalimit.

“Nxënësit janë tash t’u i bart me kombi prej Gllamnikut te rrethi i Sibofcit për me ardhë në shkollë. E kanë problem, si në këmbë, si me kombi, po e kanë problem nxënësit e shkollës”, ka thënë Syla.

Anëtarët e familjes Veliu, në pronën e të cilëve duhet të ndërtohet pjesa tjetër e nënkalimit, kanë thënë prapa kamerës se nuk do ta lejojnë ndërtimin e nënkalimit në pronën e tyre.

E përfaqësuesi i fshatit ka shprehur ankesën se nënkalimi i papërfunduar po shërben vetëm për hedhjen e mbeturinave.

“Andaj kishim bë apel që brenda mundësive sa të jetë e mundur, Ministria i ka të gjitha kompetencat, me bë çmos që këtë nënkalim me bë funksional për nevojat tona, të nxënësve tonë të cilët vijojnë shkollën këtu, janë të vogël dhe nuk kanë mundësi vetëm. Atëherë duhet me përcjellje të prindërve me ardhë”, ka thënë Bahtiri.

KOHA i është drejtuar Ministrisë së Mjedisit, Planifikimit Hapësinor dhe Infrastrukturës me pyetjet lidhur me çështjen që nga 24 marsi, porse nuk ka marrë përgjigje. Pyetjeve nuk u janë përgjigjur as në Komunën e Podujevës.

Zgjerimi i “Rrugës N25” është përcjellë me telashe që nga fillimi./KOHA.net.N.Toverlani/