“Avullohen” mijëra vota në Podujevë, ja kandidatët që po pësojnë rënien më të madhe

Procesi i rinumërimit në Qendrën e Numërimit dhe Rezultateve ka prodhuar një situatë të papritur për kandidatët e garës elektorale në komunën e Podujevës. 

Deri në orët e vona të mbrëmjes së 28 janarit, kur janë procesuar mbi 58% e vendvotimeve, shifrat tregojnë një rënie drastike të votave që ishin regjistruar fillimisht. 

Goditjen më të fortë nga ky proces deri më tani e ka marrë tabori i Lëvizjes Vetëvendosje, ku Ejup Maqedonci ka humbur 408 vota, i ndjekur nga Vendenis Lahu me 390 vota më pak dhe Adelina Stublla me një zbritje prej 239 votash. Edhe lideri i kësaj partie, Albin Kurti, ka pësuar një rënie prej 95 votash, ndërsa Fitim Haziri ka 97 vota më pak, Drita Pajaziti 82 dhe Fahrush Rexhepi 60 vota më pak.

Situatë e ngjashme po pasqyrohet edhe te subjektet e tjera, ku brenda Partisë Demokratike të Kosovës bie në sy rënia e madhe e Ditjona Statovcit me 172 vota më pak. Kandidatët e tjerë të PDK-së kanë humbje më të lehta, si Ilir Murtezaj me 28 vota, Rrahman Rama me 8, ndërsa Bedri Hamza, Enver Hoxhaj dhe Diana Shehu Devaja kanë nga 7 vota më pak. Blerta Deliu Kodra dhe Xhavit Haliti kanë humbur nga 6 vota secili. 

Ndërkohë, te Lidhja Demokratike e Kosovës, humbjet kryesohen nga Qendrim Softolli me 40 vota minus, i ndjekur nga Hykmete Bajrami me 19 dhe kryetari Lumir Abdixhiku me 17 vota më pak. Kujtim Shala ka 14 vota më pak, Arjeta Salihu Abazi 13, Ekrem Hyseni 12 dhe Visar Hoti ka mbyllur këtë listë me 8 vota të humbura. Ky proces, i cili ende nuk ka përfunduar, po ndryshon rrënjësisht peshën e secilit kandidat në terrenin e Podujevës.