Asambleisti i PDK-së kërkon seancë të Jashtëzakonshme për sigurinë në shkollat e Podujevës

Asambleisti i Partisë Demokratike të Kosovës, dega në Podujevë, Arbër Blaku, ka kërkuar nga kryetari i Komunës së Podujevës Agim Veliu si dhe nga Drejtori i Arsimit të thërrasin një seancë të jashtëzakonshme në Kuvendin Komunal lidhur me gjendjen e sigurisë në shkollat e Podujevës, sidomos pas therrjes me thik të një adoleshenti sot para shkollës së mesme Ekonomike, transmeton PodujevaPRESS.com

Asambleisti Blaku e ka arsyetuar thirrjen publike ndaj kryetarit Veliu për seancë të jashtëzakonshme me faktin se seancat kur po thirren nga opozita në Podujevë, pushteti po i akuzon se janë të shtura të mbahen vetëm për mëditje, andaj ka kërkuar që seanca të thirret nga pozita.

Ky është shkrimi i Arbër Blakut:

Thirrje publike për Kryetarin e Komunës dhe Drejtorin e Arsimit, në lidhje me gjendjen e krijuar gjatë këtyre ditëve në shkollat e Komunës së Podujevës, më konkretisht në lidhje me sigurinë në shkolla.

I bëj thirrje Kryetarit dhe Drejtorit të Drejtorisë së Arsimit që të thërrasin një seancë të jashtëzakonshme në lidhje me sigurinë dhe mbarëvajtjen e mësimit në shkollat e qytetit, të ulemi dhe të shohim mundësinë se si t’i ndalim këto fenomene të rrezikshme për nxënësit e shkollave si dhe për të gjithë qytetarë të cilët jetojnë afër shkollave.
Ne nuk duhet të presim të ndodhë më e keqja e pastaj të gjejmë ndonjë zgjidhje.