Asambleisti i LDK-së në Podujevë në konflikt interesi

Asambleisti i LDK-së është gjetur në konflikt interesi nga Agjencia Kundër Korrupsionit (AKK). Zyrtari publik, Bunjamin Hoti (LDK) këshilltar komunal në Podujevë, në të njëjtën kohë ka qenë edhe kryetar i një organizate joqeveritare.

E kjo, sipas Kundërkorrupsionit, është në kundërshtim me Ligjin nr. 06/L-011 për parandalimin e konfliktit të interesit në ushtrimin e funksionit publik.

Agjencia ka filluar ta trajtojë këtë rast, pasi që ka identifikuar se Bunjamin Hoti është kryetar i Organizatës joqeveritare “Lidhje Rinore Blu” (LRB), shkruan sot Koha Ditore.

Agjencia, nëpërmjet shkresave zyrtare, e ka njoftuar zyrtarin e lartë për fillimin e procedurave për shqyrtimin e gjendjes së konfliktit të interesit dhe pas kësaj kishte organizuar edhe takime me te në zyrat e AKK-së.

Zyrtarët e Agjencisë Kundër Korrupsionit, sipas këtyre vendimeve, e kishin njoftuar të lartpërmendurin se gjatë ushtrimit të funksionit publik nuk mund të jenë edhe persona të autorizuar në biznese private dhe nuk mund të ushtrojmë edhe funksionin e drejtuesit në organizata joqeveritare, pasi një situatë e tillë paraqet gjendje të konfliktit të interesit.

(Artikullin e plotë mund ta lexoni në numrin e sotëm të Kohës Ditore)