Arsyetimi banal i kompanive të sigurimeve për plaçkitjen që do t’u bëjnë qytetarëve

Shoqata e Sigurimeve të Kosovës [ShSK] përmes një komunikate është munduar të justifikojë rritjen e çmimeve për sigurimin e veturave për qytetarët e Kosovës. Rritja pritet të shkojë deri në 26 për qind, gjë që do të shtrenjtonte regjistrimin e sigurimin e veturave për qytetarët, për disa, edhe me qindra euro.

Komunikata në fjalë deklaron se kompanitë e sigurimeve në Kosovë po punojnë me bilanc negativ, edhe pse për një pretendim të tillë nuk ofrohet asnjë shifër e vetme.

“Sektori i Sigurimeve në vendin tonë edhe më tutje vazhdon të punoj me bilanc vjetor negativ për shkak të shumës së madhe të mjeteve që kompanitë e sigurimeve për çdo vit detyrohen të paguajnë në emër të dëmeve të mëdha që shkaktohen në vend nga automjetet e siguruara…” – shkruhet në paragrafin e parë të kësaj komunikate.

Natyrisht, kompanitë e sigurimeve nuk kanë tjetër punë pos që të sigurojnë qytetarët në rast të aksidenteve në trafik. Dhe një ankesë e tillë duket mjaft absurde.

Kjo shoqatë në dy raste bën referencë me shtetet e rajonit – në të parin duke thënë se Kosova ka numrin më të madh të automjeteve të pasiguruara në rajon, dhe në të dytin duke thënë se shuma e dëmeve të kompensuara kalonte shifrën e 400 milionë eurove, e që ishte më e lartë se vendet e rajonit – por duke mos ofruar asnjë evidencë për pretendimet e tyre, shkruan Periskopi.

“Kompanitë e sigurimit janë në gjendje të rendë financiare, pasi që ka rritje ekstreme të aksidenteve me lëndime të rënda, por edhe aksidenteve më lëndime të lehta. Kjo që ka ndodhur në vendin tonë nuk ka ndodhur në asnjë vend tjetër të rajonit, por edhe më larg.” – thotë një fjali tjetër qesharake e kësaj komunikate.

Ndërkohë, më poshtë mund të shihni se si nxjerr e prezanton shifrat e saj kjo shoqatë në faqen e saj online:

Ndryshe, të shtunën pritet të mbahet një protestë para Bankës Qendrore të Kosovës [BQK] në lidhje me këtë çështje.

Më poshtë e keni komunikatën e plotë të ShSK-së:

“Sektori i Sigurimeve në vendin tonë edhe më tutje vazhdon të punoj me bilanc vjetor negativ për shkak të shumës së madhe të mjeteve që kompanitë e sigurimeve për çdo vit detyrohet të paguajnë në emër të dëmeve të mëdha që shkaktohen në vend nga automjetet e siguruara, por edhe rreth 100 mijë automjete të pasiguruara sa llogaritet të jenë në vendin tonë”.

“Referuar të dhënave zyrtare Kosova ka numrin më të madh të automjeteve të pa siguruara se të gjitha shtetet e rajonit”.

“Bazuar në të dhëna zyrtare të Bankës Qendrore të Kosovës (BQK), shihet shumë qartë se nga vitit 2002, e deri në fund të muajit shtator të këtij viti, shuma e dëmeve të kompensuar kalon shifrën mbi 400 milionë euro, shifër kjo më e lartë krahasuar me vendet e rajonit”.

“Por, gjatë gjithë këtyre viteve në total të gjitha kompanitë e sigurimit që operojnë në vendin tonë kanë arritur të humbin më shumë se 16 milionë euro, pra nëse e nxjerrim një mesatare nga viti 2002 e deri më tash të gjitha kompanitë e sigurimit që operojnë në vendin tonë gjatë çdo viti kanë humbur rreth 900 mijë euro. përveç numrit në rritje të automjeteve të pa siguruara, numrit në rritje të aksidenteve, në bilancin negativ vjetor të kompanive të sigurimit kanë ndikuar edhe obligimet shtese që industria e sigurimit është dashur të paguaj ndaj shtetit, si asnjë korporatë tjetër në Kosovë”.

“Kompanitë e sigurimit janë në gjendje të rendë financiare, pasi që ka rritje ekstreme të aksidenteve me lëndime të rënda, por edhe aksidenteve më lëndime të lehta. Kjo që ka ndodhur në vendin tonë nuk ka ndodhur në asnjë vend tjetër të rajonit, por edhe më larg. Ka rritje të konsiderueshme të dëmeve, polica e sigurimit e cila edhe më rritjen e fundit ka çminim më të lirë në rajon, deri sa ka një mbulueshmëri deri në një milionë euro, shumë kjo e barabartë me shtete të zhvilluara Evropiane”.

“Industria e sigurimit në vendin tonë përpos rëndësisë ekonomike që ka, luan edhe një rol të rëndësishëm në aspektin social, kur dihet se në të direkt dhe indirekt punësohen mbi 2700 punëtor në të gjitha komunat e vendit”.

“Tendenca për të dëmtuar industrinë e sigurimeve, ku më shumë se gjysma është me kapital të huaj dëmton edhe imazhin e vendit karshi investitorëve të huaj të cilët edhe më tutje Kosovën e shohin si mundësi për ta investuar një pjesë të kapitalit të tyre”./Periskopi