Arrestohet aktivisti i VV-së

Lëvizja “Vetëvendosje” përmes një njoftimi në rrjetin social Facebook ka bërë me dije se arsyeja pse Sahiti është arrestuar është se ka qenë pjesëmarrës në një aktivitet simbolik muaj më parë.

Sipas Vetëvendosjes, Policia me veprime të tilla po konfirmon se është e instumentalizuar dhe se sipas tyre, në vend të angazhimit për rend e ligj, ajo është e përqendruar në zbatimin e urdhrave politike të pushtetit të kriminalizuar.

Njoftimi i plotë i Vetëvendosjes:

Policia ka arrestuar aktivistin Fatos Sahiti
Në kufirin Kosovë-Shqipëri, duke u kthyer nga Shqipëria, Policia e Kosovës ka arrestuar aktivistin Fatos Sahiti. Arsyeja që është dhënë më ketë rast ka qenë pjesëmarrja e aktivistit Sahiti në një aksion simbolik muaj më parë.

Policia me veprime të tilla po e konfirmon se është e instrumentalizuar, dhe në vend të angazhimit për rend e ligj, ajo është e përqendruar në zbatimin e urdhërave politike të pushtetit të kriminalizuar.

Arrestimet e këtilla dhe përndjekja e persekutimi i vazhdueshëm i aktivistëve të VETËVENDOSJE!-s nga pushteti përmes organeve të rendit dhe të drejtësisë, janë të papranueshme. Frika nga humbja e pushtetit i ka përshkallëzuar të këqijat e pushtetarëve dhe sheshazi e ka nxjerrë fytyrën e këtij regjimi autoritar, që qëllimin kryesor e ka- luftimin e zërave opozitarë.

Kërkojmë që veprimet e tilla të marrin fund, si dhe lirimin e menjëhershëm të aktivistit Fatos Sahiti. Asnjë lloj veprimi, asnjëherë, nuk do ta zmbrapsë aktivizmin tonë dhe nuk e ndalon përpjekjen tonë për një shoqëri të drejtë dhe një shtet demokratik.