Arrestohen tre të rinj, dyshohet se tentuan të vjedhin një veturë

Cak i hajnave shumë herë kanë qenë dhe vazhdojnë të jenë veturat, të cilat qytetarët nuk po kanë siguri t’i lënë askund. Automjete të ndryshme po vidhen qoftë në parkingje apo hapësira tjera publike, e madje edhe nga oborret e shtëpive. E të dyshuarit në të shumtën e rasteve kapen menjëherë nga Policia,  raporton Gazeta Sinjali.

Të njëjtin fat e patën edhe tre të rinj në Vushtrri, të cilët dyshohet se tentuan të vidhnin një veturë.

Burimet e Gazetës Sinjali brenda Prokurorisë kanë bërë me dije se tre të dyshuarit, njëra prej tyre e mitur, dyshohet se kanë tentuar të kryejnë veprën pak momente pasi janë liruar nga Policia si të dyshuar për një tentim vjedhje tjetër.

Të dyshuarit janë shoqëruar në stacion policor, ku janë intervistuar lidhur me rastin.

Me urdhër të prokurorit, dy prej të dyshuarve janë dërguar në mbajtje, ndërsa e mitura do të hetohet në liri. Ata do të hetohen për veprën penale ‘Tentim vjedhje’.