Arrestohen tre të mitur për shitblerje të drogës, u kapën afër gjimnazit

Konsumimi i drogës është një dukuri që po lulëzon në të gjitha qytetet dhe po prek në veçanti të rinjtë, duke e dëmtuar shëndetin e tyre. Kjo po dëshmohet çdo ditë me arrestimin e dhjetëra të dyshuarve, për posedim e shitblerje të substancave narkotike, raporton Gazeta Sinjali.

Një rast i tillë është zbuluar edhe të mërkurën në rrugën “Bill Clinton” në Klinë, afër gjimnazit ‘Fehmi Agani”, ku gjatë patrullimit në një pikë kontrolli, Policia ka ndaluar tre të mitur, nën dyshimet për gjësende të kundërligjshme.

Gjatë kontrollimit të të dyshuarve, zyrtarët policorë kanë gjetur dhe sekuestruar nga njëri prej të dyshuarve, një sasi të substancës narkotike të llojit marihuanë, që është sekuestruar. Kjo ka bërë që Policia të kryejë bastisje në shtëpinë e tij, ku edhe aty kanë gjetur drogë.

Për shkak të posedimit të narkotikëve, tre të dyshuarit janë arrestuar dhe shoqëruar në stacionin policor, ku janë intervistuar nga hetuesit policorë për veprën për të cilën ngarkohen.

Burimet e Sinjalit kanë bërë të ditur se Prokurori i Shtetit ka urdhëruar ndalimin e dy të dyshuarve kryesorë, për shitblerje të drogës dhe dorëzimin e kallëzimit penal brenda afatit ligjor së bashku me sendet e sekuestruara me rastin e kontrollit policor.