Arrestohen dy zyrtarë të lartë të komunës, njëri prej tyre Drejtor i Shërbimeve Publike
Enver Shabani drejtor i Shërbimeve në Suharekë dhe Berat Kabashi zyrtar ne drejtorin e shërbimeve publike/menaxher i kontratës është arrestuar sot nga policia.
Ky arrestim vjen pas raportimit të Insajderit. Të njëjtit dyshohen se kanë përfituar nga detyra e tyre duke shkelur ligjin e Prokurimit Publik.
Gazeta Insajderi kishte raportuar në prill se ishte hapur tenderi për ndërtimin e disa rrugëve në fshatin Mushtisht, ani pse për të njejtat rrugë ishte lidhur kontrata në vlerë prej 72 mijë eurove vitin e kaluar.
Bëhet fjalë për ndërtimin e rrugëve: Rexhep Velia, Molika , Shaljanët, Tafa, Ilaz Shala, Gentiana, Haxhi Shania, Avdyl Aga, Jetush Shala dhe Kovaqi.
Saktësisht me datën 17 maj 2022, Komuna e Suharekës kishte nënshkruar kontratë në vlerë prej 72 mijë e 213 eurove për ndërtimin e rrugëve të përmendura më sipër.
