Armë pa leje në shtëpi në Podujevë, policia sekuestron pushkë gjysmëautomatike

Një rast i mbajtjes në pronësi, kontroll apo posedim të paautorizuar të armës është iniciuar të enjten në fshatin Dobratin të Podujevës, pas një denoncimi për kërcënim.

Sipas informatave të siguruara ekskluzivisht nga Sinjali, më 18.12.2025 rreth orës 11:30, Stacioni Policor Podujevë ka pranuar njoftim për një rast kërcënimi në rrugën “Shaban Maliqi”, ku dyshohej se në shtëpi kishte edhe armë zjarri. Njësia reaguese ka dalë menjëherë në vendin e ngjarjes.

Me pëlqimin e ankueses dhe dëshmitares, njësia policore ka kryer kontroll në shtëpi, ku është gjetur dhe sekuestruar një pushkë gjysmëautomatike e tipit EM 48, së bashku me 41 fishekë.

Dëshmitarja ka deklaruar se arma i përkiste bashkëshortit të saj, me të cilin bashkëjeton në të njëjtën shtëpi. I dyshuari, i cili ndodhej në punë në Obiliq, është udhëzuar të paraqitet në Stacionin Policor Podujevë, ku është intervistuar në cilësinë e të dyshuarit në prani të avokatit mbrojtës.

Pas intervistimit, me urdhër të Prokurorit kujdestar, rasti është iniciuar për veprën penale “Mbajtje në pronësi, kontroll apo posedim i paautorizuar i armës”, ndërsa i dyshuari është liruar për t’u proceduar në procedurë të rregullt.

Hetimet lidhur me rastin janë në vazhdim.