Analizë: A do ta ketë fatin e tregut të qytetit edhe tregu i gjelbër në Podujevë ?! (FOTO)

Podujeva njihet qysh herët si vend i tregtarëve, ndërsa në mungesë të kushteve shitësit ambulantë kanë vërshuar duke ekspozuar mallin e tyre pranë rrugëve kryesore dhe trotuareve të qytetit, njofton PodujevaPRESS.

Para disa ditësh ishte bërë njoftimi  nga organet komunale se në fillim të muajit maj do të filloi së funksionuari tregu i i ri i gjelbër, ku do të ketë hapësira dhe vende të veçanta për shitje të produkteve bujqësore dhe produkteve të qumështit.

PodujevaPRESS ka realizuar disa foto dhe biseda me tregtar të cilët afarizmin e zhvillojnë në tregun e qytetit i cili para disa vitesh ishte zhvendosur nga vendi i tij i vjetër, afër stacionit policor, aty ku tani po ndërtohet objekti i ri i Kuvendit Komunal të Podujevës dhe është bartur afër ish “Sillosit”.

Shitësit shprehen të zhgënjyer me përzgjedhjen e lokacionit që kanë bërë organet komunale. Ata shprehen se “shitjet janë përgjysmuar prej se na e kanë ndërruar lokacionin e po ashtu edhe fitimet janë zvogëluar dukshëm, madje ka ditë që dalim vetëm sa për ta kaluar ditën dhe për ta ndërruar mallin se fitim s’ka hiç”, shkruan PodujevPRESS.

Ata shprehen të brengosur për investimin pa vend që është bërë, duke aluduar në shumë lokale që kanë mbetur të zbrazëta dhe të pa shfrytëzuara fare, e po ashtu edhe numri i shitësve në treg është zvogëluar shumë. Hapësirat brenda tregut shpeshherë shërbejnë për parking veturash, e herë si deponi bërlloku, ndërsa rrethojat për ekspozim të drunjve-kunjave për kultivim të produkteve bujqësore.

Mbetet të shihet se cili do të jetë efekti dhe fati i tregtarëve i Tregut të Gjelbër dhe se a do ta ketë fatin e tregut të qytetit, ndërsa ndikim në këtë mes ka edhe vetëdijesimi qytetar për tu shërbyer me produkte nga vendi i destinuar për to. /PodujevaPRESS/