Kosova do të mbajë zgjedhje për të dytën herë brenda vitit. Ndonëse, më 11 qershor u votua për nivel qendror, më 22 tetor do të votohet për qeverisjen lokale.

Se a priten ndryshime në zgjedhjet lokale nga ato nacionale, kanë folur analistët e çështjeve politike në vend.

Në një prononcim për “Indeksonline”, Ernest Luma ka thënë se ndonëse zgjedhjet për qeverisje lokale ndryshojnë nga ato nacionale, mund të ketë befasi më 22 tetor.

“Mendoj që mund të ketë befasi, por prapë se prapë zgjedhjet lokale mund të rezultojnë ndryshe, mund të ketë tjetër trend nga zgjedhjet nacionale. Është e rëndësishme kandidati, por në radhë të parë e rëndësishme është se si partitë politike janë përcaktuar tek kandidatët e tyre për komuna. Kandidatët më të mirë do të fitojnë dhe qytetarët do të votojnë për kandidatët dhe jo për subjektet në radhë të parë”, ka thënë ai.

I bindur se 22 tetori do sjellë ndryshime, është analisti Bajrush Morina, sipas të cilit kjo do të ndodhë për shkak të vetëdijesimit të qytetarëve se pothuajse të gjitha partitë politike nuk kanë çka të ofrojnë.

“Zgjedhjet kanë kuptim vetëm kur prodhojnë ndryshime. Edhe zgjedhjet e 11 Qershorit sa do që nuk revoltuan me fitore ato sollën ndryshime. Edhe në zgjedhjet e 22 tetorit unë pres ndryshime. Kjo do të ndodhë për shkak se qytetarët tashmë janë vetëdijesuar më shumë dhe se partitë politike, pothuaj të gjitha, janë shpenzuar…nuk kanë më çka të japin e çka të premtojnë më shumë”, ka thënë ai për “Indeksonline”.

Morina ka deklaruar se ndonëse procesi i ndryshimit ecë ngadalë në Kosovë, e rëndësishme është që  siç shprehet ai, “të bijnë poshtë të mëdhenjtë, e të vegjlit të çohen!”.

Koalicioni PAN ishte renditur i pari në zgjedhjet nacionale të 11 qershorit. Ndërsa, Lëvizja Vetëvendosje ka pasur rritjen më të madhe duke dyfishuar numrin e deputetëve. /Indeksonline/