“Alternativa” ende pa qëndrim për mocionin e opozitës

Për rrëzimin e qeverisë së Isa Mustafës është nisur një mocion mosbesimi nga Nisma për Kosovën. Pro kësaj kanë dalë edhe partitë opozitare si Lëvizja Vetëvendosje dhe Aleanca për Ardhmërinë e Kosovës.

Pa qëndrim për këtë çështje është partia më e re në vend, “Alternativa”.

Ilir Deda në një prononcim për “Indeksonline” ka thënë se nuk e ka diskutuar ende çështjen me partinë e tij dhe se pritet të merret një vendim në ditët në vijim.

“Ende nuk kemi pasur takim zyrtar për këtë ështje, dhe vendimin do ta marrim pas këtij takimi eventual”, ka thënë Deda.

Ndryshe, deputetë të Nismës për Kosovën kanë bërë të ditur se kanë mbledhur nënshkrimet nga partitë opozitare për këtë mocion, duke përfshirë edhe të disave nga deputetët e pozitës.

Kujtojmë se kreu i Qeverisë, Isa Mustafa është shprehur i bindur se do të vazhdojë qeverisjen e tij deri në fund të mandatit, përkundër tentativave për zgjedhje të parakohshme.

Kurse, opozita ka deklaruar se pret që deri në fund të javës do të mblidhen nënshkrimet dhe mocioni do të dërgohet në rend dite javën tjetër në Kuvendin e Kosovës./Indeksonline/