Alarmante: 2 sulme në shkolla brenda 4 muajve në Podujevë

Këshilli Komunal për Siguri në Bashkësi diskutoi për gjendjen e sigurisë në Podujevë, ku u theksua fakti shqetësues i dy sulmeve të ndodhura në shkolla brenda periudhës katër mujore.

Komandanti i Stacionit të Policisë në Podujevë, Bashkim Bajrami, raportoi se nga data 01.12.2024 deri më 25.03.2025, përveç dy sulmeve në shkolla, janë regjistruar edhe një rast i lëndimit të rëndë trupor, 38 vjedhje, si dhe janë konfiskuar 27 armë dhe 321 fishekë. Gjithashtu, janë kapur 2262 gram substanca narkotike dhe janë arrestuar 59 persona.

Gjatë kësaj periudhe, autoritetet kanë shqiptuar 3341 gjoba trafiku dhe janë regjistruar 97 aksidente me dëme materiale dhe 39 aksidente me persona të lënduar. Po ashtu, janë raportuar 30 raste dhune në familje, 25 raste posedimi të narkotikëve dhe 50 raste armëmbajtjeje pa leje.

Komandanti Bajrami theksoi gjithashtu planet operative dhe ligjërata edukative të mbajtura në shkolla mbi rreziqet e internetit dhe masat parandaluese ndaj bullizmit.

Përfaqësuesit e KFOR-it dhe FSK-së vlerësuan situatën e sigurisë si të qetë dhe theksuan bashkëpunimin me institucionet lokale për të siguruar stabilitetin.

Në kuadër të diskutimeve, Drejtori i Drejtorisë së Arsimit, Avni Fetahu, prezantoi raportin mbi aktivitetet e Këshillit Komunal për Siguri në Bashkësi për vitin 2024. Ndërsa në pikën “Të ndryshme”, anëtarët e KKSB-së trajtuan çështje të infrastrukturës dhe shërbiimeve publike, duke e lidhur ato me sigurinë e qytetarëve.

Pavarësisht vlerësimit për një situatë të qetë dhe stabile, rastet e dhunës në shkolla dhe numri i lartë i rasteve kriminale mbeten shqetësime serioze për komunitetin e Podujevës.