Alarm për dhunën në familje: 30 raste të raportuara në vetëm katër muaj në Podujevë!
Këshilli Komunal për Siguri në Bashkësi (KKSB) u mblodh për të diskutuar situatën e sigurisë në Podujevë, e cila u vlerësua si e qetë dhe stabile nga autoritetet. Megjithatë, raportet zyrtare tregojnë një panoramë shqetësuese me rritjen e rasteve kriminale dhe incidenteve të dhunshme.
Komandanti i Stacionit të Policisë në Podujevë, Bashkim Bajrami, raportoi se nga data 01.12.2024 deri më 25.03.2025 janë regjistruar dy sulme në shkolla, një lëndim i rëndë trupor, 38 raste vjedhjeje dhe janë konfiskuar 27 armë e 321 fishekë. Po ashtu, janë kapur 2262 gram substanca narkotike dhe janë sekuestruar 2004 euro, si dhe pajisje të ndryshme elektronike.
Një nga shqetësimet më të mëdha mbetet dhuna në familje, me 30 raste të raportuara vetëm gjatë kësaj periudhe. Ky fenomen vazhdon të jetë një problem serioz, duke kërkuar masa të menjëhershme parandaluese dhe ndërhyrje institucionale për mbrojtjen e viktimave.
Në këtë periudhë janë shqiptuar 3341 gjoba trafiku, janë raportuar 25 raste të posedimit të narkotikëve dhe 50 raste të armëmbajtjes pa leje. Po ashtu, janë regjistruar 24 raste zjarrvënieje dhe janë arrestuar 59 persona.
Komandanti Bajrami shpjegoi edhe masat parandaluese të ndërmarra, përfshirë ligjërata në shkolla mbi përdorimin e internetit dhe bullizmin. Përfaqësuesit e KFOR-it dhe FSK-së vlerësuan sigurinë si të qetë, por theksuan rëndësinë e bashkëpunimit të vazhdueshëm me institucionet lokale.
Gjatë takimit, Drejtori i Drejtorisë së Arsimit, Avni Fetahu, prezantoi raportin mbi aktivitetet e KKSB për vitin 2024. Në diskutimet e mbajtura, anëtarët e KKSB-së trajtuan edhe çështje infrastrukturore dhe shërbime publike që lidhen me sigurinë e qytetarëve.
Pavarësisht vlerësimit të përgjithshëm për një situatë të qetë, numri i lartë i rasteve të dhunës në familje është një thirrje për veprim nga të gjitha institucionet dhe komuniteti.
