Aksioni i Antidrogës: Këta janë dy të dyshuarit që u kapën me rreth 20 qese drogë
Një aksion i Njësisë për Hetimin e Trafikimit me Narkotikë i zhvilluar të martën në mbrëmje në Ferizaj ka rezultuar me sekuestrimin e një sasie të marihuanës dhe arrestimin e dy personave të dyshuar për shitblerje të drogës. Të dyshuarit janë punëtorë në një lokal të floktarisë, ku po ashtu u krye bastisje, me ç’rast janë gjetur edhe dëshmi të tjera, raporton Gazeta Sinjali.
Burimet brenda Prokurorisë kanë bërë me dije për Sinjalin se bëhet fjalë për P. P. dhe D.H., i moshës së mitur, të cilët kanë përfunduar në Polici si të dyshuar për rastin, e më pas janë dërguar në mbajtje.
Sipas informacioneve të para, dy të dyshuarit janë ndaluar nga Policia mbrëmë pas mesnate, në rrugën “Sejdi Sejdiu”, ku janë kapur në flagrancë me një sasi të narkotikëve. Pas sekuestrimit të drogës, Policia ka kryer kontroll në një ‘Berber Shop’, ku punojnë të dyshuarit, me ç’rast edhe aty janë gjetur rreth 20 qese me marihuanë.
Njësia e Antidrogës ka sekuestruar edhe prova të tjera gjatë këtij aksioni, që do të shfrytëzohen si dëshmi lidhur me rastin.
Pas përfundimit të aksionit, dy të dyshuarit janë shoqëruar në stacion policor për intervistim dhe më pas ndaj tyre është nxjerrë aktvendim për ndalim.
Ndaj tyre, Prokurori i Shtetit ka urdhëruar inicimin e rastit për veprën penale “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge”.
Sinjali do të iu mbajë të informuar me detajet e reja.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.
