Aksidenti me fatalitet në Podujevë, këta janë dy personat që humbën jetën

Një vetaksident i rëndë që ndodhi pak orë më parë në fshatin Sfeqël të Podujevës, la të vdekur dy persona, teksa u lëndua rëndë një tjetër. Shoferi i veturës dhe njëri prej pasagjerëve nuk arritën t’i përballojnë plagët dhe ndërruan jetë në vendin e ngjarjes, ndërsa pasagjeri tjetër u dërgua me urgjencë në spital, raporton Gazeta Sinjali.

Sinjali mëson se viktima e dytë, pas Ultrim Mehmetit, është Qëndrim Boshnjaku [rreth 28-vjeç].

Zëdhënësja e Policisë së Kosovës për Rajonin e Prishtinës, Flora Ahmeti, tha për Sinjalin se vdekjen e viktimave e ka konstatuar ekipi mjekësor që doli në vendin e ngjarjes.

“Sot rreth orës 20:30 në rrugën që lidhë fshatin Sfeqël me fshatin Shajkovc të Podujevës, ka ndodhur një aksident trafiku, ku është përfshirë një veturë.  Si pasojë e aksidentit tre persona kanë pësuar lëndime të rënda trupore.  Dy nga personat e lënduar nuk kanë arrit të përballojnë plagët e shkaktuara nga aksidenti dhe të njëjtit kanë vdekur.  Vdekjen e viktimave e ka konstatuar ekipi mjekësor në vendngjarje. Me hetimin për zbardhjen e shkaqeve të këtij vetaksidenti, po merren hetuesit nga Njësiti i trafikut”, tha Ahmeti.