Aksident trafiku përfundon me përleshje në Lupç të Epërm, pesë persona të përfshirë – katër arrestohen

Një incident i rëndë ka ndodhur pasditen e së dielës në fshatin Lupç i Epërm të Podujevës, ku një aksident trafiku është përshkallëzuar në përleshje fizike mes personave të përfshirë.

Burime të sigurta nga Prokuroria kanë konfirmuar se rasti ka ndodhur më 2 nëntor 2025, rreth orës 16:50, kur Stacioni Policor në Podujevë ka pranuar fillimisht një informacion për një aksident komunikacioni në atë lokacion.

Teksa njësia policore ishte nisur drejt vendit të ngjarjes, është marrë një njoftim i dytë se personat e përfshirë në aksident kishin filluar të rriheshin mes vete.

Në vendngjarje, policia ka hasur katër persona të moshave rreth 26, 29, 34 dhe 37 vjeç, ndërsa një tjetër person i përfshirë në incident ishte transportuar për trajtim mjekësor në QKUK–Prishtinë, për shkak të gjendjes së rënduar shëndetësore.

Sipas hetimeve fillestare, pas aksidentit ndërmjet dy automjeteve, palët janë përfshirë fillimisht në konflikt verbal, i cili më pas ka degjeneruar në përleshje fizike. Dyshohet se në konflikt janë përfshirë edhe disa anëtarë të tjerë të familjes së njërës palë, të cilët ende nuk janë hasur nga policia, por janë ftuar për intervistim.

Në konsultim me prokurorin kujdestar, rasti fillimisht është kualifikuar si “Sulm”, por pas pranimit të raporteve mjekësore dhe evidentimit të dëmtimeve, është rikualifikuar si “Lëndim i rëndë trupor” dhe “Asgjësim apo dëmtim i pasurisë”.

Me urdhër të prokurorit, katër të dyshuarit janë ndaluar për 48 orë, ndërsa i dyshuari që ndodhet në gjendje të rëndë është transportuar me autoambulancë në QKUK-Prishtinë, nën përcjellje policore, ku po mbahet nën sigurim nga njësia policore.

Hetimet për zbardhjen e plotë të rastit po vazhdojnë në koordinim me Prokurorinë Themelore në Prishtinë.