Ajet Potera: Më 12 tetor, ta kthejmë Podujevën në duar të ndershme — ndryshimi fillon me qytetarin!

Aktivisti dhe njohësi i çështjeve publike, ish anëtari i Lëvizjes Vetëvendosje Ajet Potera, i cili tani ma dal në mbështetje të kandidattit të LDK-së Ekrem Hyseni, ka dërguar një mesazh të fuqishëm për qytetarët e Llapit dhe Gollakut, duke bërë thirrje për ndryshim të vërtetë në zgjedhjet e 12 tetorit dhe për kthim të besimit në institucionet lokale.

Në reagimin e tij, Potera thekson se “e mbara në komunën tonë fillon me ndjenjën e përgjegjësisë dhe dashurisë për komunën, në fshat e në qytet”, duke u bërë thirrje qytetarëve të zgjedhin një kryetar të përgatitur, të ndershëm dhe të përgjegjshëm, që punon për qytetarët dhe jo për interesa personale.

“Kryetari i mirë ndërton rend, rregull e disiplinë, vendos etikë dhe sjellje profesionale. Krijon meritokraci, transparencë dhe llogaridhënie të qartë para qytetarëve. Kjo do të thotë kthim i besimit në institucionet lokale”, ka shkruar Potera.

Sipas tij, mendimi ndryshe nuk duhet të frikësojë, por të shihet si pasuri e komunës. Vetëm përmes përfshirjes së secilit qytetar, sipas Poterës, mund të ndërtohet një komunë më e fortë, më e drejtë dhe më e bashkuar.

Ai ka theksuar se qytetarët e Podujevës kanë nevojë për udhëheqës të afërt me njerëzit, jo për zyrtarë që mbyllen në zyra dhe harrojnë qytetin.

“Administrata, arsimi, shëndetësia, policia dhe gjyqësori duhet të jenë në shërbim të qytetarit. Nuk ka më justifikime, nuk ka më privilegje — ka vetëm shërbim dhe përgjegjësi. Qytetari ynë e meriton këtë”, ka theksuar ai.

Në mesazhin e tij, Potera ka kërkuar që projektet të lindin nga vetë komuniteti, duke përmendur nevojën për shkolla moderne, shëndetësi funksionale, bujqësi të mbështetur, rrugë të asfaltuara dhe ujë të pastër në çdo shtëpi.

Ai ka theksuar se është koha për hapësira për të rinjtë, gratë dhe personat me aftësi të veçanta, si dhe për bashkëpunim me intelektualët dhe biznesmenët e Llapit e Gollakut brenda e jashtë vendit.

“Përgjegjësia nis nga vetja! Shembulli personal është prova më e fortë e karakterit. Prandaj, ta fillojmë punën mbarë, me zemër, me vullnet dhe me ndershmëri”, ka përfunduar Potera.

Në fund të reagimit, ai u ka bërë thirrje qytetarëve që më 12 tetor të bëjnë zgjedhjen e mençur, duke nënvizuar se:

“Nuk guxojmë ta lëmë komunën në duar të korruptuarve. Llapjanët nuk i durojnë zullumqarët! Ndryshimi fillon me qytetarin dhe me kryetarin e ri, bashkë!”